പ്രിയംവദ

ഫെമിനിസ്റ്റുകള്‍ മാത്രം സഞ്ചരിക്കുന്ന ബസ്‌.

2008-10-21T08:35:00.007+08:00

പത്തു വറ്ഷങ്ങളുക്കു അപ്പുറം ,തിരുവനന്തപുരം നഗരം ..തിങ്കളാഴ്ച്ച രാവിലെ 8 മണി
കുട്ടിയെ ഏല്‍പ്പിച്ചു ജോലിക്കു പോവാന്‍ ഒരുങ്ങി,ഗേറ്റ്‌ അനങ്ങുന്നതും കാത്തു നില്‍ക്കുന്ന ഒരുവള്‍

ഹാവൂ..ശാന്ത എത്തി..
പ്രത്യക്ഷദൈവത്തൊടെന്ന പോലെ "എന്തേ ശാന്തെ വൈകിയതു" എന്നു വളരെ ഭവ്യതയോടെ ചോദിച്ചു..

അതു പിന്നെ മോട കെട്ടിയ്യോന്‍ കുറച്ചു ദിവസ്സിയായ്‌ വന്നിട്ടു, പെണ്ണു കരച്ചിലാ...
പിന്നെ ...ഹും ..രാവിലെ 6.30 നു പേയാടു നിന്നു സിറ്റിയിലെക്കു ബസില്‍ വരുന്ന ഒറ്റ പെണ്ണുങ്ങളുക്കും ഭറ്ത്താവില്ല ...ഇവക്കു പൈത്യം...

ശാന്ത അതു കയ്പ്പുള്ള സ്വരത്തില്‍ പറഞ്ഞിട്ടു ഒന്നു ചിരിച്ചു .....

ശാന്തയും ആ സൗഭാഗ്യം പണ്ടെ വേണ്ടെന്നു വച്ചിരിക്കുയാണു...ഉപേക്ഷിച്ചു കടന്നു കളഞ്ഞ ആ ഓട്ടോക്കാരനെ മറന്നു കളഞ്ഞേക്കാന്‍ മകളോടു പറഞ്ഞും കഴിഞ്ഞു...... അല്ലാ പിന്നെ....

ശാന്ത കൂടുതല്‍ അശാന്തയാവുന്നതിനു മുന്‍പു പടി കടന്നു.

6.30 നുള്ള ബസ്സിലാണു ശാന്തയടക്കമുള്ള അടുക്കള ജോലിക്കാരി പെണ്ണുങ്ങള്‍ തിരുവനന്തപുരം സിറ്റിയിലേക്കു എത്തുന്നതു...
രണ്ടോ മുന്നോ വറ്ഷത്തെ വിവാഹജീവിവിതം ഒന്നൊ രണ്ടൊ കുട്ടികള്‍ ...ഒരു ജോലിക്കും പോവാതെ ചിലറ്, സ്ത്രീധന ബാക്കി അങ്ങിനെ എന്തൊക്കെയോ കാരണങള്‍ പറഞ്ഞു കുടിച്ചു വന്നു ഭാര്യയെ തല്ലുന്നവര്‍ ,സഹികെടുമ്പോള്‍ ഒരു ദിവസം ധൈര്യപൂര്‍വ്വം വലിച്ചെറിഞ്ഞു സിറ്റിയിലേക്കു വണ്ടികയറും..

ഇതാണു മിക്കവരുടെയും പൂര്‍വകഥ .അവരുടെ കവിളിലെ കരിമംഗലങ്ങള്‍ കണ്ണിരുണങ്ങിയ പാടുകളാണെന്നു തോന്നും ..
ഈ ധൈര്യശാലികള്‍ തിരുവന്തപുരത്തിന്റെ പ്രതേയ്കതയായി തോന്നിയിട്ടുണ്ടു ,അവിടെ എല്ലാ ജാതിയിലും നില നിലക്കുന്ന മാതൃദായക്രമമാണെന്നു തോന്നുന്നു അവറ്ക്കി ധൈര്യം നല്‍കുന്നതു..വട്ക്കുന്നു വന്നവരെ ഈ ധൈര്യം അല്‍പം അത്ഭുതപ്പെടുത്താറുണ്ടു....

കണ്ണിലെ തിളക്കവും വായിലെ പല്ലും നഷ്ടപ്പെട്ടിട്ടും മുരുകനെ ഒരിക്കലും കുറ്റപ്പെടുത്താതെ അയാളൊടൊപ്പം എന്നെങ്കിലും പഴനിയില്‍ പോകണമെന്നു മാത്രമാണു അവലോസുപൊടി വറുക്കാന്‍ വരുന്ന വള്ളി ആഗ്രഹിച്ചിരുന്നതു .അറ്ദ്ധരാത്രിയിലെ സ്വാതന്ത്ര്യം ഷാപ്പില്‍ എന്നും ആവോളം ആഘോഷിച്ച ശേഷം ഓടയില്‍ വിശ്രമം ആരംഭിക്കുന്ന വറ്ക്കി ചേട്ടന്‍ വീട്ടിലെ കയറുകട്ടിലില്‍ ഉറക്കം ഉണരുന്നതും ത്രേസ്യാ ചേടത്തി കുറി നടത്തി പെണ്‍പിള്ളേരെ കെട്ടിക്കുന്നതും അല്ലെ നാട്ടു നടപ്പു?..

ഏതായാലും ശാന്തയുടെ ആ വെളിച്ചപ്പെടലിനു ശേഷം ശാന്തമാരെയെല്ലാം ഫെമിനിസ്റ്റ്‌ ബസിലെ സഞ്ചാരിണികള്‍ എന്നായിരുന്നു ഞങ്ങള്‍ വിളിച്ചാദരിക്കാറു..
അയല്‍ ഗ്രാമങ്ങളില്‍ നിന്നു വരുന്ന അവരെ പി ടി പി നഗറില്‍ ,ശാസ്തമംങലത്ത് ,ജവഹര്‍ നഗറില്‍ , പ്രശാന്ത്‌ നഗറില്‍ എലലാം അഴുക്കു തുണികളും ,പാത്രങ്ങളും കാത്തിരുന്നു .ഫ്രിഡ്ജില്‍ തലേന്നത്തെ കടും മഞ്ഞ പുളിശേരിയും, ചൂര കറിയും

ആ വീടുകളിലെ വെറുതെ ചില ഭാര്യമാരില്‍ ,അസി. ബാങ്ക്‌ മാനേജര്‍ ആയ ഒരു സ്ത്രീ ഉണ്ടായിരുന്നു...എഴുതി തെളിയുന്ന ഒരു കഥാകാരി ഉണ്ടായിരുന്നു, അവറ്ക്കു വിദ്യാസമ്പന്നരായ ഭറ്ത്താക്കന്മാരും.. എന്നാല്‍ നിറ്ഭാഗ്യവശാല്‍ ഉദ്യോഗപറ്വ്ത്തില്‍ പെണ്‍പ്പിറവികള്‍ ഒരു പടി മുന്നിലായിരുന്നു . ഭറ്ത്താവിന്റെ അസൂയാകലുഷിതമായ പരിഹാസങ്ങള്‍ കേട്ടില്ലെന്നു നടിച്ചു ,കഴുത്തിലെ താലികയറും മക്കളെയും മാറി മാറി നോക്കി നെടുവീപ്പിട്ടു , ഒന്നും സംഭവിക്കാത്തതു പോലെ അവറ് തിടുക്കത്തില്‍ ഓഫീസിലേക്കു ഒട്ടൊയില്‍ കയറി പോയിരുന്നു.

ആ വീടുകളിലെ വെറുതെ ചില ഭറ്ത്താക്കന്മാരില്‍, ഭാര്യയുടെ ഒഡേറ്ലിയെ പോലെ റിട്ടയെറ്ഡ്‌ ജീവിതം കഴിക്കാന്‍ വിധിക്കപെട്ട ഒരു കേണല്‍ ഉണ്ടായിരുന്നില്ലെ? ഉറപ്പായും ഒരാള്‍ ഉണ്ടായിരുന്നു..ഭാര്യ സായി ഭജന്‍ എന്നു പറഞ്ഞു പോവുന്നതെവിടെ എന്നു അറിയുന്ന ഒരു MD യും ഉണ്ടായിരുന്നിരിക്കണം...ഇല്ലെ?

ഒന്നര വറ്ഷത്തെ വിവാഹ ജീവിതത്തിനു ശേഷം, അപൂറ്വ്വം ചില സായാന്‍‌ഹങ്ങള്‍ പോലും ഭറ്ത്താവിനും അവന്റെ പ്രിയ സ്നേഹിതനും ഒറ്റയ്ക്കു വിട്ടു കൊടുക്കാന്‍ മടിച്ചു, കലി തുള്ളി വീട്ടിലേക്കു മടങ്ങിയ ഒരു സുന്ദരി ഉണ്ടായിരുന്നു ....മൂക്കു കയറിന്റെ, പരിഭവം പറച്ചിലുകളുടെ ,കണ്ണിരിന്റെ ,തലവേദനകളുടെ അനന്ത സാധ്യതകള്‍ അവള്‍ ആയോധമുറകളാക്കിയതു അവളെ പറഞ്ഞു ആരു പഠിപ്പിച്ചിട്ടാണു?..

ഒരു മിടുക്കിയുണ്ടായിരുന്നു ,പ്രസന്ന വദന...ശമ്പളം മുഴുവന്‍ പിടിച്ചു വാങ്ങിയും ,അവളെ അടക്കി ഭരിച്ചും ഒരു മിടുക്കനും....ഒടുവില്‍ ഒന്നും സഹിക്കാന്‍ കഴിയാതെ എല്ലാം അവ്സാനിപ്പിച്ചു കടന്നു പോയി അവള്‍ ...ലക്ഷ്മണ രേഖകള്‍ വരയ്ക്കണമെന്നും ,കന്നിനെ കയം കാണിക്കരുതെന്നും ആ മിടുക്കനെ ആരൊ ബോദ്ധ്യപ്പെടുത്തിയിരുന്നുവത്രെ....

ആരായിരിക്കും ? അല്ലെങ്കില്‍ പ്രതേയ്കിച്ചു ആരുമായിരിക്കില്ല, ഇതെല്ലാം അവരെ പറഞു പഠിപ്പിച്ചതു-ജനിതിക ദോഷം,ആറ്ജിത സ്വഭാവ വൈകല്യങ്ങള്‍,വളര്‍ത്തു ദോഷം ,നാട്ടു നടപ്പു, മഞ്ഞകണ്ണടകള്‍ ..അങ്ങിനെ എന്തും ആവാം..
വിവാഹം എന്നാല്‍ എതിറ് കഷിയെ നൂറു ശ്തമാനം വരുതിയില്‍ നിറുത്തുന്നതിനുള്ള അനുമതി പത്രം അല്ലെന്നും മറിച്ചു പരസ്പര
പൂരകമായി ,പങ്കാളിക്കാവശ്യമായ സ്പെസ് വിട്ടുകൊടുത്തു ജീവിക്കുന്നതാണു അതിന്റെ വിജയമന്ത്രം എന്നും ആരും വിശദീകരിച്ചു തന്നെന്നു വരില്ല.. മനസ്സിലാക്കി വരുമ്പൊള്‍ വൈകി പോവുന്നതാവാം മുഖ്യ പരാജയകാരണം.

എങ്കിലും ഒന്നു ചോദിച്ചൊട്ടെ ,ദാമ്പത്യം പോലെ മറ്റേതെങ്കിലും ബന്ധമുണ്ടൊ?..എത്രയും സുന്ദരമാകാനും ഭീകരമാകാനും കഴിയുന്നത്.വെറുതെയല്ലാത്ത ഭാര്യയും ഭറ്ത്താവും എത്ര ശതമാനം വരും? ആറ്ക്കെങ്കിലും അറിയുമൊ ?..

വെറുതെ ഒന്നു അറിഞ്ഞിരിക്കാനാ.....

അനുബന്ധം....

പത്തു വറ്ഷത്തിനിപ്പുറം ആ ഫെമിനിസ്റ്റുകളുടെ ബസ്സിനു എന്തു സംഭവിച്ചിരിക്കും? അതിലെ പുലറ്ക്കാല റ്റ്രിപ്പിലെ സഞ്ചാരിണികള്‍... ,അവറ് ഇപ്പൊഴും ഉണ്ടൊ? അവരിലെ പുതു തലമുറ ചയില്‍ഡ്‌ കെയറ് ജീവനകാരികള്‍ ആയി എങ്കിലും മോക്ഷം നേടിയിരിക്കില്ലെ ?പുതു തൊഴില്‍ സാധ്യതകള്‍ കാരണമുള്ള ഹൈ അട്ട്രിഷന്‍ വീട്ടമ്മമാറ് യന്ത്രവല്‍ക്കരണം നടപ്പാക്കി പ്രതിരോധിച്ചിരിക്കാനാണു സാധ്യത ...എന്നാല്‍ ഭക്ഷണം... ഔട്ട്‌ സോറ്സ്സ് ചെയ്തിരിക്കുമോ?..

നമതിനു ഒരു കംമന്റ്‌ എഴുതി തുടങ്ങിയതാണു ,അതിങ്ങനെയായി..:)

അടുക്കളരാഷ്ട്രീയം (സസ്യേതരം)

2008-06-19T09:00:00.005+08:00

ഇതൊരു പാചകകുറിപ്പല്ല..നമ്മുടെ നാടു പോലെ തന്നെ അടുക്കളയും ഇപ്പോള്‍ കൂട്ടു മുന്നണികളാണു ഭരിക്കുന്നതു എന്നൊരു അതിഥി സൂചിച്ചപ്പോഴാണു ഞാനും ശ്രദ്ധിക്കുന്നതു .. ചിലതെങ്കിലും ആര്‍ക്കെങ്കിലും പ്രയോജനപ്പെടുന്നെങ്കില്‍ നല്ലതല്ലെ എന്നു കരുതി ഇവിടെ ചിലതു കുറിക്കുന്നു....ഇതൊരു ബാര്‍ട്ടര്‍ സിസ്റ്റം ആണുകെട്ടൊ ..നിങ്ങളുടെ രീതികള്‍ പങ്കു വച്ചാല്‍ പരസ്പരം പ്രയോജനകരം ആവും:)

രുചിയുമായി ബന്ധപ്പെടുത്തി ഭക്ഷിക്കാന്‍ മാത്രം തയ്യാറാവുന്ന കുട്ടികള്‍ , ജീവിതം സമ്മര്‍ദ്ദഭരിതം;ആകയാല്‍ ജീവരക്തം അനുദിനം സ്നേഹപൂര്‍ണവും മധുരോദാരവും ആയികൊണ്ടിരിക്കുയും ചെയ്യുന്ന കാലഘട്ടത്തില്‍ ജീവിക്കുന്ന മുതിര്‍ന്നവര്‍, ചിരപരിചിതമായ അടുക്കള വിഭവങ്ങളുക്കു ലഭ്യതാ പരിമിതികള്‍ ഉള്ള ഒരു മറുനാടന്‍ മാര്‍കെറ്റ്‌ ,അടുക്കള സഹായികളുടെ അഭാവം, ഓഫീസ്‌ തിരക്കുകള്‍ ,അതിഥികള്‍ എന്നിവ ഒക്കെയും ഒരു ജഗ്ഗ്‌ളറുടെ മനഃസ്സാന്നിദ്ധ്യത്തോടെ കൈകാര്യം ചെയ്യേണ്ടിവരുന്ന ഒരു അവസ്ഥയിലും ആരോഗ്യകരമായ ഒരു പാചശൈലി പിന്തുടരണം എന്നുള്ള തീവ്രമായ ആഗ്രഹങ്ങളും അനേഷണങ്ങളും അവസാനിക്കുന്നതു പലപ്പൊഴും കൂട്ടു മുന്നണികളിലാണു..

സിംഹപുരിയുടെ കാര്യം പറഞ്ഞാല്‍ അനേകായിരം ഫുഡ്‌ കോര്‍ട്ടുകള്‍ പിട്‌സ , ഡെലിവറികള്‍ ..ബഹുരാഷ്ടകുത്തകള്‍ കീഴടക്കുന്ന രസമുകുളങ്ങള്‍ എന്നൊക്കെയുള്ള വേറേയും ഭീഷണികള്‍ മറി കടന്നുവേണം വീട്ടു ഭക്ഷണമേശയിലേക്കു കുടുംബത്തെ ആവാഹനം ചെയ്യേണ്ടതു.

മാംസഭക്ഷണത്തിന്റെ അളവു കുറയ്ക്കാനും കുട്ടികള്‍അറിയാതെ തന്നെ പച്ചക്കറികള്‍ അകത്തെത്തിക്കാനും ഞാന്‍ എപ്പോഴും ഒറ്റകക്ഷികളെ ഉപേക്ഷിച്ചു കൂട്ടുമുണണികളെയാണു ആശ്രയിക്കുക. പച്ചക്കറികള്‍ പാത്രത്തിന്റെ അരികിലേക്കു നീക്കി വയ്‌ക്കാതിരിക്കുക എന്നതായിരുന്നു മുഖ്യലക്ഷ്യം.

അപൂര്‍വമായിമാത്രമെ ചിക്കെന്‍ തനിയെ വയ്ക്കാറുള്ളു...ബ്രൊക്കോളി , കാപ്സിക്കും,വഴുതങ്ങ , ചീര (അതു പോലത്തെ ഇലകള്‍) എന്നിങ്ങനെ ആയിരത്തി എട്ടു കൊംബിനേഷന്‍ പരീക്ഷിക്കാവുന്നതാണു. പച്ചക്കറികള്‍ തനിയെ വഴറ്റി അവസാനം ചേര്‍ക്കുകയാവും വേവ്വു വ്യത്യാസം ക്രമീകരിക്കാന്‍ നന്നു .. വറുത്തരച്ചു വയ്ക്കുന്ന ചിക്കെന്‍ -മട്ടന്‍ കറികളില്‍ ശീമ ചക്ക ,ഇടിചക്ക എന്നിവ്‌ ചേര്‍ക്കാം ,നാരുകളുടെ അളവു കൂടും..പണ്ടു വല്ലപ്പൊഴും മട്ടന്‍ കറിവയ്ക്കുമ്പോള്‍ കുമ്പളങ്ങ (ഇളവന്‍) കിട്ടിയില്ലെങ്കില്‍ അമ്മ ഇതികര്‍ത്തവ്യതാമൂഡയായിരിക്കുന്നതു കണ്ടിട്ടു അതു അളവുതികയ്ക്കാണുള്ള വേവലാതി മാത്രമാണെന്നാണു ഞാന്‍ അന്നു കരുതിയിരുന്നതു..പഴയ കൊംബിനേഷന്‍സ്‌ സാമ്പത്തികമായും ആരോഗ്യപരമായും നന്നു എന്നു ഇപ്പോള്‍ തോന്നുന്നു.

ബിരിയാണിയില്‍ കാരട്ടു,പീസ്‌, തുടങ്ങിയവ ലോഭമന്യെ ചേര്‍ക്കാം.. കട്ട്‌ലെട്ടുകളില്‍ ബീറ്റ്‌റൂട്ട്‌ , ഉരുളകിഴങ്ങു ,പീസ്‌ ഒക്കെ ചേര്‍ത്താലും കുട്ടികള്‍ സസന്തോഷം കഴിക്കും.(വിരുന്നുകാര്‍ ഉള്ളപ്പോള്‍ ഒറ്റ കഷികള്‍ തന്നെ വേണ്ടിവരും.അല്ലെങ്കില്‍ ചിലപ്പോള്‍ പിശുക്കാണെന്നാവും ചിലര്‍ ധരിക്കുക)

പ്രോണ്‍സ്‌(കൊഞ്ചു/ചെമ്മീന്‍) ഒരു വിധം എല്ലാ പച്ചക്കറികളോടും പരിഭവമില്ലാതെ ചേര്‍ന്നു പോവും .കായ,അച്ചിങ്ങ,പീച്ചിങ്ങ ,ചക്കകുരു തുടങ്ങിയ നാടന്‍ പച്ചക്കറികളോടും ബ്രൊക്കോളി,കാപ്സിക്കം തുടങ്ങിയ ആധുനികരോടും. ഇതു പുതിയ കണ്ടുപിടത്തമൊന്നുമല്ല കെട്ടൊ,എന്റെ കുട്ടിക്കാലത്തു ഇന്നെന്താ കൂട്ടാന്‍ എന്ന അയല്‍കാരി ചേടത്തിമാരുടെ പുലര്‍കാല അഭിവാദനങ്ങളില്‍ പല തവണ കേട്ടിട്ടുള്ളതാണു ..ചെമ്മീനും ,പീച്ചിങ്ങയും ചെമ്മീനും കായും എന്നൊക്കെ..

തുളസിയില തായ്‌ പാചകങ്ങളില്‍ പ്രോന്‍സിനും ബീഫിനുമൊപ്പം ചേര്‍ക്കാറുണ്ടു, ഒരു ഫ്ലേവര്‍ ആയി അല്ല,ഒരു കോമ്പിനേഷന്‍ ആയി തന്നെ.

മുട്ടയാണു പ്രോന്‍സുമായി ഈ കാര്യത്തില്‍ മല്‍സരിക്കാനുള്ളതു...ഒട്ടുമിക്ക ഇലകറികളിലും മുട്ട ചേര്‍ക്കുന്നതു അതിനെ കൂടുതല്‍ ആകര്‍ഷണീയമാക്കും,വിശേഷിച്ചു കുട്ടികളുക്കു.. കാബ്ബേജ്‌,മുരിങ്ങിയില ,വാട്ടര്‍ ക്രെസ്സ്‌ ,ചീര എന്നിവയുടെ തോരന്‍ ബാകി വന്നാല്‍ രാത്രിയില്‍ ഒരു മുട്ട കൂടി ചേര്‍ത്തു വഴറ്റി എടുത്താല്‍ അതു ലെഫ്റ്റ്‌ ഓവര്‍ കറികളുക്കു ഒരു പുതുജീവന്‍ കൊടുക്കും .കുട്ടികള്‍ കൂട്ടാന്‍ മടിയ്ക്കുന്ന വെണ്ടയക്ക,എങ്ങനെ പാചകം ചെയ്യണമെന്നു വല്യ പിടിയില്ലാത്ത ഇലകള്‍ (ഇവിടെ അങ്ങിനെ കുറെ തരം ഇലകള്‍ കിട്ടും) ഒക്കെ ഇങ്ങനെ {camouflage} നടത്തി കഴിപ്പിക്കാം

ചമ്മന്തി /ചറ്റ്‌ണികള്‍ നിര്‍മാണത്തില്‍ തേങ്ങയുടെ ഉപയോഗം കുറയ്ക്കാന്‍ ഒരു പാടു വഴികളുണ്ടു.ധാരാളം ഇഞ്ചി ,ചെറിയ ഉള്ളി,റ്റൊമാറ്റൊ ,ചില പച്ചകറികള്‍ ( കോവയ്ക്ക, ഫ്ലറ്റ്‌ ബീന്‍സ്‌ ) ,മല്ലിയില ,കറിവേപ്പില എന്നിവ വഴറ്റി അല്‍പ്പം തേങ്ങ ചേര്‍ത്തോ ചേര്‍ക്കാതെയൊ ചമ്മന്തികള്‍ സൃഷ്ടിക്കാം. ഇഞ്ചി കൂടുതല്‍ ചേര്‍ക്കുന്നതിനാല്‍ ഇഡ്ലിദോശയുടെ ഒരു ഉപോല്‍പ്പന്നമായ ഗ്യാസിനെതിരെയും ഫലപ്രദമാണു. ചിലപ്പോഴെല്ലാം എള്ളു ,ഉഴുന്നു ഇവ വറുത്തു മല്ലിയില ചേര്‍ത്തു ചമ്മന്തി അരച്ചാണു സസ്യാഹാരികളായ അതിഥികളെ പ്രീതിപ്പെടുത്താറു. പലവിധത്തില്‍ പരീക്ഷണം നടത്തി 'ഡിസൈനര്‍ ചമന്തികള്‍ ഉണ്ടാക്കാവുന്നതെയുള്ളു. ദോശകളിലും കോംബിനേഷന്‍ പരീക്ഷിക്കാം ,ചെറുപയര്‍,പരിപ്പു എന്നിവ ചേര്‍ത്തരച്ച അട ദോശകള്‍ ഇടയക്കു ഒക്കെ ആകാം.

ഓലന്‍ ,എരിശ്ശെരി, കൂട്ടുകരി, പയറൊ പരിപ്പൊ ചേര്‍ത്ത ചീര ,വഴകൂമ്പ്‌,ഉണ്ണിപിണ്ടി തുടങ്ങിയ കേരളത്തിന്റെ തനതു(?) വെജെറ്റെറിയന്‍ കറികളില്‍ മാംസ്യ-സസ്യ കൂട്ടുകെട്ടു ശക്തം.

സാലഡുകളില്‍ മുളപ്പിച്ച പയര്‍ ചേര്‍ത്തു അതിനെ കൂടുതല്‍ പോഷക സമൃദ്ധമാക്കാം.

എണ്ണയാണു ഇപ്പോള്‍ മറ്റൊരു കൂട്ടുകക്ഷി, സൂര്യകാന്തി എണ്ണയും ഒലിവ്‌ ഓയില്‍ ചേര്‍ന്ന കൊംബിനേഷന്‍ ഇപ്പോള്‍ മര്‍ക്കെറ്റില്‍ ലഭ്യമാണു , സസ്യേതര പാചകങ്ങളില്‍ രുചിഭെദം അത്രയ്ക്കു അനുഭവപ്പെടാറില്ല.

സമര്‍പ്പണം..ചേട്ടനു രണ്ടുദിവസം ബ്രെഡും ഉണ്ടാക്കികൊടുത്തു വല്ലോം എഴുതിയിടൂ എന്നു പറഞ്ഞ ഒരു അനിയത്തിക്കുള്ള ഒരു പ്രതികാരം

അതിജീവനകല

2008-05-24T21:10:00.011+08:00

പ്രണയം നിര്‍മ്മിക്കുന്ന പദാര്‍ത്ഥം എന്താണു എന്ന നമതിന്റെ ചോദ്യം വായിച്ചപ്പോള്‍ പണ്ടെന്നൊ കുറെ കാലം മനസ്സിലുണ്ടായിരുന്ന ഒരു ചോദ്യം ഓര്‍മ്മ വന്നത്‌... പ്രണയം നിര്‍മ്മിക്കുന്നതും നിലനിര്‍ത്തുന്നതുമായ പ്രതിഭാസം എന്തായിരിക്കും അതും ഒരു ഏക ദിശാ പ്രണയം ?

Gone with the wind ലെ സ്കാര്‍ലെറ്റ്‌ ഒഹാരയുടെ കഥ വായിച്ചപ്പോള്‍ മുതല്‍ ആയിരുന്നു ആ ചോദ്യം മനസ്സില്‍ കുടിയേറിയതു.
മെലനിയുമായുള്ള വിവാഹം നിശ്ചയിക്കപ്പെട്ടിരുന്ന ആഷിലിയോടു അവള്‍ നടത്തുന്ന പ്രണയാഭ്യര്‍ഥനയില്‍ തന്നെ തുടങ്ങുന്നു വൈചിത്ര്യം.നിരസ്സിക്കപ്പെട്ടതിന്റെ പ്രതികാരം എന്ന വണ്ണം ആഷിലിയുടെ ഭാര്യ സഹോദരനെ വിവാഹം കഴിച്ചു അവള്‍ , അധികം താമസിയാതെ വിധവയായുമായി ,അമ്മയും. ഒരിക്കലും സ്വീകരിക്കപ്പെടാതിരുന്ന ആ പ്രണയം അവള്‍ക്ക്‌ സമ്മാനിച്ചതു ദുരിതങ്ങള്‍ മാത്രമായിരുന്നു.. എങ്കിലും ആശകൈവിടാതെ ദയനീയമായ അര്‍ത്ഥനകള്‍ അവള്‍ തുടരുന്നുണ്ടു .യുദ്ധകാല കെടുതിക്കള്‍ക്കിടയില്‍ തകര്‍ന്നുപോയ കുടുമ്പത്തെ കരകയറ്റുക എന്ന ദൗത്യം സ്കര്‍ലെറ്റ്‌ സധൈര്യം ഏറ്റ്ടുടക്കുന്നുണ്ടു ,.യുദ്ധമുന്നണിയിലേക്കു പോയ ആഷിലിയുടെ ആവശ്യപ്രകാരം ആയാളുടെ ഭാര്യയെയും ഏറ്റ്ടുക്കെണ്ടിവന്നു അവള്‍ക്കു.ഇതിനിടയില്‍ സ്വന്തം ജീവിതത്തെ കുറിച്ചു വിചിന്തനം നടത്താന്‍ പോലും അവള്‍ക്കു കഴിഞ്ഞില്ല .ആഷിലിയെ എന്നെങ്കിലും സ്വന്തമാക്കാന്‍ കഴിയുമെന്ന മൂഢ സ്വര്‍ഗത്തിലായിരുന്നു ,സ്കാര്‍ലെറ്റ്‌..അതിനാല്‍ പ്രണയവും സംരക്ഷണയും നല്‍കാന്‍ എന്നും സന്നദ്ധനായിരുന്ന രെറ്റിനെ നിരസ്സിക്കാന്‍ അവള്‍ മടിച്ചതുമില്ല...

( ബുക്ക്‌ വായിക്കാന്‍ കഴിഞ്ഞിട്ടില്ല എങ്കില്‍ വിക്കിയില്‍ കഥാസംക്ഷിപ്തമുണ്ടു ,കൂടുതല്‍ എഴുതിയാല്‍ മാര്‍ഗ്രെറ്റ്‌ മിച്ചെലിന്റെ ആതമാവിനു പോലും സഹിച്ചെന്നുവരില്ല..,പിന്നെ ഈ കൃതിയുടെ ആരാധകര്‍ക്കും..)

പ്രണയത്തിന്റെ വിഗതികള്‍ വിചിത്രം ..ആദ്യ വായനയില്‍ എന്നെ സ്കാര്‍ലെറ്റ്‌ കുഴക്കി...'"ഈ പെണ്ണിനു വട്ടാ'"' ആഷിലി ഒരു കോന്തന്‍ ..എന്നൊക്കെ യാണു അന്നു കൗമാരകുതൂഹലം കൈവിട്ടിട്ടിലാതിരുന്ന വായനക്കാരിയുടെ ആതമഗതം ..രെറ്റ്‌ എന്ത പറയുക? ചെയ്യുക ? എന്നൊക്കെയുള്ള ആകാംഷയില്‍ പേജുകള്‍ അതിവേഗം മറിഞ്ഞു......ഇന്നത്തപ്പോലെയല്ല ,കഥാ പാത്രങ്ങളുടെ ഭാവിയില്‍ കടുത്ത ആശങ്ക തോന്നിയിരുന്ന കാലമായിരുന്നു...:)

പിന്നീടു വായിച്ചപ്പോഴും സിനിമ കണ്ടപ്പോഴുമെല്ലാം കുറച്ചു കൂടി മുതിര്‍ന്നിരുന്നു.......യുദ്ധത്തില്‍ കത്തിയെരിയുന്ന തെരുവിലൂടെ മെലനിയേയും അവളുടെ നവ ജാത ശിശുവിനേയും കൊണ്ടു 'ടാര എന്ന സ്വതം എസ്റ്റേറ്റ്റ്റിലേക്കു യാത്ര ചെയ്യാന്‍ കാണിക്കുന്ന ധൈര്യം , ജോലിക്കാരുടെ താമസഥലത്തുള്ള അടുക്കള തോട്ടത്തില്‍ പോയി ഭക്ഷിക്കാന്‍ കിട്ടുമൊ എന്ന് അനേഷിക്കുന്ന പ്രയോഗികത. ടാരയിലെത്തി അതിന്റെ സംരക്ഷണം ഏറ്റ്ടുക്കുന്ന താന്‍പോരിമ .രെറ്റിനോടു പണം കടം വാങ്ങാന്‍ പോകാനായി ടാരയിയില്‍ യുദ്ധാനന്തരം അവശേഷിക്കുന്ന ഏക നല്ല തുണിയായ കര്‍ട്ടന്‍ കൊണ്ടു വസ്ത്രം തുന്നിക്കുന്ന സ്ത്രൈണകൗശലം ,വീട്ടില്‍ എത്തിയ പട്ടാളക്കാരനെ നേരിടുമ്പോള്‍ കാണിക്കുന്ന വിപദിധൈര്യം അതൊക്കെ യാണു പുനര്‍വായനയില്‍ കണ്ണില്‍പ്പെടുന്നതു.

പ്രായോഗികതയുടെ ആള്‍രൂപം എന്നു വിശേഷിപ്പിക്കാവുന്ന സ്വഭാവഗുണമുള്ളസ്കാര്‍ലെറ്റ്‌ ഒരിക്കലും ഒരു ഹീറോ ആയിരുന്നിട്ടില്ലാത്ത ആഷിലിയില്‍ പ്രണയം സമര്‍പ്പിക്കുന്നതിന്റെ വൈരുധ്യം അപ്പോഴും ബാക്കിയാവുന്നു.. ചോദ്യവും. പ്രണയം നിര്‍മ്മിക്കുന്നതും നിലനിര്‍ത്തുന്നതുമായ പ്രതിഭാസം എന്നതായിരുന്നു ? പക്ഷെ ഒന്നറിയാം ആ പ്രണയം അതാണവള്‍ക്ക്‌ പ്രതിസന്ധികളെ നേരിടാനുള്ള ധൈര്യം നല്‍കിയതു..അതിന്റെ പൊള്ളത്തരം വളരെ വൈകിയാണെങ്കിലും സ്കാര്‍ലെറ്റ്‌ മനസ്സിലാക്കുണ്ടു..പക്ഷെ വീണ്ടും കാത്തിരിക്കാനായിരുന്നു വിധി..

സര്‍വഗുണ സമ്പന്ന എന്നൊരിക്കലും വിശേഷിപ്പിക്കാന്‍ കഴിയാത്ത ഈ കഥ പാത്രം എന്തു കൊണ്ടു എപ്പോഴും ഓര്‍മയില്‍ നില്‍ക്കുന്നു എന്ന അനേഷണം ഇപ്പോള്‍ എത്തിച്ചേരുന്നതു...""അതിജീവനകല"" ..അതു സ്ത്രീ കഥാ പാത്രങ്ങളും (യഥാപാത്രങ്ങളും) സ്വായത്തമാക്കുമ്പോള്‍ അതിഷ്ടപ്പെടുന്നു എന്നുള്ളതാണു...എങ്കില്‍ പി.വല്‍സലയുടെ നങ്ങേമ മുതല്‍ സുന്ദരന്റെ ബ്ലോഗ്ഗിലെ ചിമ്മാരു മറിയത്തോളം വരുന്ന "അതിജീവനക്കാരികളില്‍ സ്കാര്‍ലെറ്റിനു എന്താണു സവിശേഷത....അതു സ്കര്‍ലെറ്റിന്റെ പ്രണയം പോലെ തന്നെ ...വിശദീകരണങ്ങളുക്കു വഴങ്ങാന്‍ പ്രയാസം :)

സ്ത്രീ എഴുത്തുകാര്‍ Event

നല്ല നടപ്പിനു ചിലവഴികള്‍

2008-01-23T21:55:00.000+08:00

.നല്ല നടപ്പിനു ചിലവഴികള്‍....ചിത്രലേഖയില്‍

സിംഹപുരം ലൈബ്രറി

2007-08-22T10:40:00.000+08:00

സിംഹപുരം ലൈബ്രറി.

രോഹിണിയുടെ യാത്രാകുറിപ്പ്

2007-07-29T12:31:00.000+08:00

പതിവില്ലാതെ പാക്ക്‌ ചെയ്യാനുള്ള സാധങ്ങളുടെകൂട്ടത്തില്‍ ക്യാമറ ആദ്യമെ എടുത്തു വച്ചപ്പോള്‍ രോഹിണിയുടെ ഭര്‍ ത്താവ് ചോദ്യഭാവത്തില്‍ നോക്കി ..ഒരു ബ്ലൊഗ്ഗര്‍ ക്യാമറ ഇല്ലാതെ നാട്ടില്‍ പോയികൂട !..മലയാളം ബ്ലോഗ്ഗര്‍ അല്ലാത്തിനാലും ബ്ലോഗിനെ പറ്റി രോഹിണി പറയുന്ന വിവരങ്ങള്‍ മാത്രം അറിയുന്ന ആളായതിനാലും രോഹിണി പറഞ്ഞതു കേട്ടു ,അതേയൊ എന്നു മാത്രം പറഞ്ഞു..

സിബി ദൂരെ നിന്നു കൈവീശി ..രോഹിണിയ്ക്കും ഭര്‍ത്താവിനും സമാധാനമായി..കൊതുകിനെതിരെ ഹര്‍ത്താല്‍ എന്നു കേട്ടിരുന്നു. വിമാനത്താവളം വിട്ടു പുറത്തു കടന്ന ഉടനെ റോഡ്‌ ചെറുതായി , നേരിയ വെളിച്ചമുള്ള ഒരു ഉള്‍നാടന്‍ പട്ടണത്തിലെ റോഡിലൂടെ വണ്ടിയോടിയപ്പോള്‍ രോഹിണിയ്ക്കു സംശയം തോന്നി..ഒരു അന്താരഷ്ട്രാ വിമാനത്താവളത്തിലേക്കുള്ള അപ്രോച്‌ റോഡ്‌ ഇത്ര ചെറുതൊ ? വീതിയേറിയ ഹൈ വേയുടെയും വെള്ളിവെളിച്ചത്തിന്റേയും ധാരാളിത്തം നാലു മണികൂര്‍ മുന്‍പുമാത്രമായിയിരുന്നൊ?

സിബിയെ.. ഇതു തന്നെയാണോ റോഡ്‌?

..മൂന്നു വര്‍ഷത്തിനിടയില്‍ റോഡ്‌ തെല്ലും മാറിയിട്ടല്ല എന്നു കണ്ടു അവളുക്കു അത്ഭുതം തോന്നി, അല്‍പം ആശ്വാസവും..ഒക്കെ അങ്ങു മാറിയാല്‍ പിന്നെ എന്തോര്‍ത്തു സങ്കടപ്പെടും,നോസ്റ്റല്‍ജിക്‌ ആവും ? ..ഒരു കുസൃതി ചിരിയോടെ രോഹിണി ഓര്‍ത്തു.

വീട്ടിലെക്കുള്ള വഴിയില്‍ നെല്‍പാടങ്ങള്‍ അധികം കണ്ടില്ല.പകരം നെല്ലുകുത്തുന്ന മില്ലുകള്‍.

ഇതിനൊക്കെ നെല്ലു എവിടുന്നാണു സിബി?

തമിഴ്‌നാട്ടില്‍ നിന്നാണു..

പുഴയില്‍ നിറച്ചു വെള്ളമുണ്ടൊ?

ഉവ്വു ..കാണണൊ?...

വേണമെന്നില്ല ..

ഇയിടെ p യുടെ ബ്ലോഗില്‍ അതിന്റെ പടം കണ്ടതാണല്ലൊ..

പാടം ഒക്കെ നികത്തിയോ?..

ഇല്ല റോഡ്‌ സൈഡില്‍ ഇല്ലായെന്നേയുള്ളു, ഉള്ളിലേക്കു ഉണ്ടു..

നാട്ടിലെ എറ്റവും ഇഷ്ടപ്പെട്ട കാഴ്ച്ചയായിരുന്നു,ഇളം പച്ച വയലുകളും വയല്‍ക്കരയിലെ തെങ്ങിന്‍ തോപ്പില്‍ നിന്നു എത്തിനോക്കുന്ന വീടുകളുടെ മേലാപ്പും...

സിബിയ്ക്കു എല്ലാ കുഴിയും പരിചയമായതിനാല്‍ അതൊക്കെ ഒഴിവാകാനായി കാറു ഒരു അഭ്യാസിയെപ്പൊലെ ചെരിച്ചും വളച്ചുമെല്ലാം ഓടികുന്നു.

ഇതു പണ്ടു അനിയന്‍ പഠിച്ചിരുന്ന പ്രൈമറി സ്കൂള്‍ അല്ലെ ?

ഒ ..അതിപ്പൊ എന്‍‌ജിനീയറിംഗ് കോളേജ് ആണു.

മാമന്റെ വീട്ടില്‍ ആദ്യം ല്ലെ...

ആയ്കോട്ടെ..

ആ ചെറിയ വഴിയില്‍ എത്ര നല്ല നല്ല വലിയ വീടുകള്‍ അതിനു മുന്നിലെ ഇട റോഡിലെ കുഴികളില്‍ വെള്ളം നിറഞ്ഞു നില്‍ക്കുന്നു ,ഇതൊക്കെ ആരാ ഒന്നു നികത്തുക? രോഹിണിക്കു വല്ലാത്ത ധാര്‍മിക രോഷം തോന്നി..അവളെ ഗൗനിക്കാതെ കൂറ്റന്‍ അരിലോറികള്‍ ആടിയുലഞ്ഞു കടന്നു പോയി.
ഈ വഴിയിലും ഒരു റൈസ്‌ മില്ല് ഉണ്ട്‌ ..സിബി പറഞ്ഞു

മഴ നനഞ്ഞു നില്‍ക്കുന്നു, കുടിയിലെ ചെമ്പരുത്തിയും ചെത്തിയും ..ഈയിടെ S -ഇന്റെ ബ്ലോഗില്‍ ഇതൊക്കെ കണ്ടതിനാല്‍ രോഹിണിയ്ക്കു പുതുമ തോന്നിയില്ല..മാമി അമ്പലത്തിലെ ഉണ്ണിയപ്പപ്രസ്സാദം തന്നു.കഴിക്കേണ്ടായിരുന്നു എന്നു തോന്നി.അതിന്റെ സ്വാദ്‌ ഒാര്‍മകളില്‍ ഭദ്രമായിരുന്നേനെ.മാമന്‍ പാവപെട്ട കുട്ടികളുക്കു പഠനം സഹായം പിരിച്ചെടുക്കാനുള്ള ശ്രമത്തിലാണു.ദാനശീലനു രോഹിണി പേന കൊടുത്തു.ആ സന്ദര്‍ശനം അവരെ സന്തുഷ്ടരാക്കി എന്നു തോന്നി.അടുത്തുള്ള ആ വലിയ വീടുകളില്‍ ഒന്നുകില്‍ അമ്മയും അച്ഛനും മാത്രമെ അല്ലെങ്കില്‍ ആരുമില്ല എന്ന അവസ്ഥയാണെന്നു പറഞ്ഞു.

ഇറങ്ങട്ടെ ,അവരു കാത്തിരിക്കുന്നുണ്ടാവും.

അമ്പലത്തിന്റെ മുന്നിലെ ആലും കുളവും വാഴതോപ്പും മാറ്റമില്ലാതെ നില്‍കുന്നു..നന്നായി..ഒരു ആവാസവ്യവസ്ഥ നിലനിന്നുപോകട്ടെ.

ഈ വഴിയില്‍ പള്ളി ഇതു പുതിയാതാണ്ല്ലൊ ,നല്ല ഭംഗി.

ഗേറ്റില്‍ നിന്നു നോക്കിയാല്‍ വീടു കാണുന്നില്ല ജാതി മരങ്ങള്‍ വീടിനെ വിഴുങ്ങുന്ന കാലം വിദൂരമല്ല എന്നു തോന്നി..മുറ്റത്തെ ചെമ്പകമെവിടെ? ജാതിയും തെങുല്ലാതെ ഉണ്ടായിരുന്ന മറ്റു മരങ്ങള്‍ എല്ലാം കാരണവര്‍ വെട്ടി വിറ്റു എന്നു തോന്നുന്നു.ഭാഗ്യം ,തുളസി തറയില്‍ വേറൊന്നും നട്ടിട്ടില്ല..

കൃഷി നഷ്ടം ..കൊടുക്കാന്‍ പോകുകയാ..കാരണവര്‍ പറഞ്ഞു..

ഇവിടിപ്പൊ സ്ഥലത്തിനു നല്ല വിലയാണു ..

ശരിയായിരിക്കും ,നെടുമ്പാശേരിയില്‍ വിമാനം പറന്നകലുന്ന ശബ്ദം ഇവിടെ വ്യക്തമായി കേള്‍ക്കാമല്ലോ

അ പഴയ വലിയ വീട്ടില്‍ അനേകം ഇലക്‍ട്രൊണിക്‌ ഉപകരണങ്ങള്‍ .പലതും കേടായി ,ചിലതു പുതിയതു...
മൈക്രൊ വേവ്‌ മാത്രമാണില്ലാതിരുന്നതു..അതാണു ഒന്നു വേണമെന്നു പറഞ്ഞത്‌.
അതെയൊ..രോഹിണി ഭവ്യമായി പറഞ്ഞു

വലിയപാട്ടി പതിവുപോലെ വേവലാതിയിലാണു..ഇഡിലിമാവില്‍ വെള്ളം ചേര്‍ത്തു..ചട്ടണിക്കു അരയ്കാന്‍ വാടി വീണ തേങ്ങ പെറുക്കി കൂട്ടിയിട്ടിരിക്കുന്നതില്‍ നിന്നു ചെറിയാരെണ്ണം തിരഞ്ഞെടുത്തു.. കൂട്ടി വച്ച കാപ്പിയില്‍ ചൂടു വെള്ളം ഒഴിച്ചു..എങ്കിലും എല്ലാത്തിനും സ്വാദ്‌ ഉണ്ടാവും, കിണര്‍ വെള്ളത്തിനു സ്വാദ്‌ പകരാന്‍ കഴിയും എന്നു തോന്നുന്നു.

ചെറിയ പാട്ടി തിരക്കിട്ടു കണക്കെഴുതുകയാണു.
..കാളി തേങ്ങ മടല്‍ 4.60 പൈസ...അല്ലെങ്കില്‍ മറന്നു പോകും..
കണക്കു പുസ്തകം മടക്കി വച്ചു ഗുളിക കഴിക്കാന്‍ പോയി..ഇന്‍സുലിനും എടുക്കണം.
രോഹിണി പുസ്തകം മറിച്ചു നോക്കി..മൊബൈല്‍ ചാറ്ജ് ചെയ്യാ‍ന്‍ 500 ,ജാതി വിറ്റ വകയില്‍ ഇനി ബാക്കി കിട്ടാനുള്ളതു.. 6300 . പഴയതാളുകളൊന്നില്‍ ബൈ പാസ്സ്‌ സര്‍ജെറി അമൃത ..2.5 ലക്ഷം..
പാട്ടി തിരിച്ചു വന്നു ,സിബിയ്ക്കു എത്രയാ കൊടുത്തെ? അവനോടു എത്രമണിക്കാണു വരാന്‍ പറഞ്ഞതു ?..
അന്തമില്ലാത്ത വേവലാതികള്‍ കേള്‍ക്കാന്‍ നില്‍ക്കാതെ രോഹിണി ക്യാമറ എടുത്തു കുടിയിലേക്കിറങ്ങി.

തൊഴുത്തിന്റെ പടം പിടിക്കണൊ ,അതൊ കിണറിന്റെ പടം പിടിക്കണൊ?ഏതായിരിക്കും കൂടുതല്‍ നൊസ്റ്റാല്‍ജിക്‌? ഈ വലിയ പാട്ടിയുടെ മുഖത്തെ ചുളിവുകള്‍..നന്നായിരിക്കും..

വലിയ പാട്ടി വിലക്കി , ഇത്ര അടുത്തുനിന്നു വേണ്ട...കിഴവിയെപോലെ ഇരിക്കും.. കൊറച്ചു ദൂരെ നിന്നു മതി..ങെ!

പൂജാ മുറിയില്‍ അമൃതാന്ദമയിയും സായിബാബയും മുഖ്യ സ്ഥാനത്തിരിക്കുന്നതു കണ്ടു ..മകള്‍ അമ്മയുടെ ഭക്ത,ചെറിയ മരുമകള്‍ സായി ഭക്ത..എന്തെങ്കിലും ഒന്നില്ലാത്ത ആളുകളില്ലാത്രെ.. മുറികളുടെ സ്ഥാനം മറ്റാന്‍ പോവുകയാണു , വാസ്തു പുരുഷനു അസ്വസ്ഥത ഉണ്ടാക്കുന്ന നിലയിലാത്രെ ഇപ്പൊഴത്തെ കിടപ്പ്‌.

നഗരത്തിലേക്കുള്ള യാത്ര , റോളര്‍ കോസ്റ്റര്‍ റൈഡ്‌ പോലെ .വെള്ളം ഒഴുകിപോവാനുള്ള യാതൊരു വഴിയും ഇല്ല ,കാല്‍ നടപാത എന്നൊരു കണ്‍സെപ്റ്റ്‌ തന്നെ ഇല്ല..റോഡിനു വേണ്ടി വണ്ടികളും കാല്‍നടക്കാരും മഴ വെള്ളവുമെല്ലാം മല്‍സരിക്കുന്നുവെന്നു തോന്നി.

അതെയ്‌ ഇവിടെ നാടു മുഴുവനും അങ്ങു പുരോഗമിച്ചു ..ആകെ മൊത്തം ഒരു തീം പാര്‍ക്ക്‌ സ്റ്റൈല്‍ ആണു...

ഇപ്പൊ ഒരു മാതിരി തമാശ കേട്ടലൊന്നും ഒരു ഗുമ്മില്ല,രോഹിണിയുടെ ഒരു ദിവസം എത്ര തമാശകളിലൂടെയാണു കടന്നു പോകുന്നതു .അവള്‍ കണ്ണടച്ചിരുന്നു.

സിബി ഇനി അടുത്തെവിടെയാ ഇന്റര്‍നെറ്റ്‌കഫെ ? 24 മണികൂര്‍ പോലും ആയില്ല ,ചാംഗിയില്‍ വച്ചു മെയില്‍ എല്ലം ക്ലിയര്‍ ചെയ്തതാണു എന്നിട്ടും ഭര്‍താവിനു വിത്ഡ്രോയല്‍ സിംറ്റംസ്‌ കണ്ടു തുടങ്ങി..
ബ്ളാക്ക്ബെറി ഇല്ലെ ?
അതുപോര...ഒരു ഫയല്‍ ക്ളിയറ് ചെയ്യാനുണ്ടു.
കാക്കനാടു എത്തിയാല്‍ ഒന്നുണ്ട്‌.

നിനക്കെങ്ങിനെ അറിയാം? ..

രോഹിണി ത്രികാലജ്ഞാനിയെപ്പോലെ മന്ദഹസിച്ചു..

അനിയത്തിയും ഭര്‍ത്താവും നിറഞ്ഞ ചിരിയോടെ സ്വീകരിച്ചു,ഇനി പോകുന്നതു വരെ രണ്ടുപേരുടെയും വായും അടഞ്ഞിരിക്കുന്ന പ്രശനമില്ല ,പുരുഷകേസരികള്‍ മിതഭാഷികളെപോലെ കളി പറഞ്ഞു.

അവര്‍ നാട്ടു വിശേഷങ്ങളുടെ കെട്ടഴിച്ചു ,ചേട്ടനും ഭാര്യയും അവരുടെ അടുത്തു താമസിക്കുന്നതിനു വേണ്ടി നോക്കി വച്ചിരിക്കുന്ന വീടുകളെയും സ്ഥലങ്ങളേയും പറ്റി വിവരിച്ചു..വില കേട്ടു തല തിരിഞ്ഞു.. പാടം നികത്തി നിര്‍മിച്ചിരികുന്ന 'വാലി'കള്‍ കരപാടങ്ങളില്‍ 'മെഡോസ്‌' പിന്നെ ചെറിയ കുന്നുകളില്‍ 'ഹൈറ്റ്‌സും' .പേരെല്ലാം അര്‍ത്ഥവത്തായതു..ഇന്റര്‍നെറ്റില്‍ നോക്കി, വില്ല എല്ലാം സോള്‍ഡൗട്ട്‌..കേരളത്തില്‍ വീടുകൃഷി മാത്രമാണിപ്പോള്‍ ലാഭത്തില്‍ നടക്കുന്നത്‌.

സ്മാര്‍ട്ട്‌ സിറ്റി ആണു ഈ വിലവിസ്ഫോടനത്തിന്റെ പ്രഭവ കേന്ദ്രം എന്നു പത്ര പരസ്യങ്ങള്‍ സാക്ഷ്യപ്പെടുത്തി ,എല്ലാ വീടുകളുക്കും പ്ലോട്ടുകളുക്കും സ്മാര്‍ട്ട്‌ സിറ്റിയില്‍ നിന്നുള്ള ദൂരമാണു , സീപ്പോര്‍റ്റ്ട്‌ എയര്‍പോര്‍ട്ട്‌ റോഡില്‍ സ്മാര്‍ട്ട്‌ സിറ്റിക്കടുത്തായി ചേര്‍ത്തലയില്‍ 12 സെന്റ്‌ ...ങെ!

ഫ്ളാറ്റുകള്‍ നോക്കി നഗരത്തിലെത്തിയ രോഹിണിയ്ക്കു ,നഗരം മാലിന്യകൂമ്പാരമാണെന്നു A യുടെ ബ്ലോഗില്‍ കണ്ടിരുന്നതിനാല്‍ അത്ഭുതം തോന്നിയില്ല, ഇനി ഇതിന്റെ പടം പിടിച്ചു ബ്ലൊഗിലിട്ടു സ്വതവെ ദുര്‍ബലമനസ്കരയായ NRI ബ്ലൊഗ്ഗെര്‍സിന്റെ മനഃസമാധാനം നഷ്ടപ്പെടുത്തേണ്ട എന്ന് അവള്‍ തീരുമാനിച്ചു.

ഹോസ്പിറ്റലില്‍ പനി പിടിച്ചു കിടന്ന അമ്മാവനെ കണ്ടു മടങ്ങുമ്പോള്‍ ഇടനാഴിയിലെ നീല സാരി അണിഞ്ഞ പെണ്‍കൂട്ടത്തിന്റെ വിളര്‍ത്ത മുഖങ്ങളെ രോഹിണി അതീവ സഹതാപത്തോടെ നോക്കി ,അവരുടെ കഥ വായിച്ചിരുന്നല്ലൊ. ചുമരിലെ നിറഞ്ഞ ചിരിയുടെ ചെറിയ ലാഞ്ചന പോലും അവിടെ കണ്ടില്ല.

ഒ ഇന്നൊന്നും നടക്കുന്ന മട്ടില്ല സിനിമ കണ്ടാലോ.സിനിമാപ്രിയന്റെ
ശബ്ദം കേട്ടു .. ...ആയ്കൊട്ടെ..

സിറ്റിയിലൂടെ നടക്കുന്നതും റോഡ്‌ ക്രോസ്സ്‌ ചെയ്യുന്നതുമെല്ലം
ബുദ്ധിമുട്ടാണെന്നു അനിയത്തി പറഞ്ഞപ്പോള്‍ ഇത്രയക്കു തോന്നിയിരുന്നില്ല. രണ്ടു വര്‍ഷം എന്റെ കാല്‍കീഴില്‍ കഴിഞ്ഞ നഗരമല്ലെ.

ഇറങ്ങാനും കേറാനും സമ്മതിക്കാതെ തിരക്കിട്ടു പായുന്ന ബസ്സുകള്‍ , ബസ്സ്റ്റോപ്പില്‍ ചെളി കുഴി ,ബസ്സ്‌ നിര്‍ത്തുന്നതു റോഡിനു നടുവില്‍.. വെറുതെയല്ല ചെറിയ ദൂരത്തിനു പോലും ആളുകള്‍ ഒട്ടൊ പിടിക്കുന്നത്‌. ചോദിച്ചതു കൂടുതലാണെന്നറിയാമെങ്കിലും, ഇന്ത്യന്‍ സാമ്പത്തിക വ്യവസ്ഥിതിക്കു ഒരു ചെറിയ കൈതാങ്ങ്‌ എന്ന പതിവു ഹെഡിലാണു ഇത്തരം സാമ്പത്തികാബദ്ധങ്ങള്‍ എഴുതി തള്ളാറുള്ളതെന്നോറ്ത്തു.

കുളം എന്നവസാനിക്കുന്ന പേരു ഈ നഗരത്തിന്റെ വളരെ ചേരുന്നുവല്ലോ ,പേരിന്റെ ഉല്‍ഭവം എവിടെ നിന്നാണെ ങ്കിലും അതു നഗരഹൃദയത്തിലെ റോഡിലെ കുഴികള്‍ അതു അന്വര്‍ത്ഥമാക്കുന്നുണ്ട്‌.

തിരക്കിലൂടെ നീന്തി തീയേറ്റ്രിനറ്റുത്തെത്തി..ടികെറ്റില്ല , സെക്കന്റ്‌ ഷോയക്കു ഇരട്ടി വിലയില്‍ തരാമെന്നു പെട്ടിക്കടയുടെ പിന്നില്‍ നിന്നൊരു സിനിമാപ്രവര്‍ത്തകന്‍ പറഞ്ഞു.പ്രതിസന്ധിയിലായ സിനിമ വ്യവസായത്തിനുവേണ്ടി ജനം സഹിക്കുന്ന കഷ്ടപ്പാടുകള്‍ ലാല്‍ ജോസ്‌ അറിയുന്നുണ്ടോ? ശ്രീനിവാസന്‍ അറിയുന്നുണ്ടോ ?
എതിരെയുള്ള ഡി സി ബൂക്സ്‌ ആണു രോഹിണിയെ സന്തോഷിപ്പിച്ച്തു.

പക്ഷെ ഇന്നു ഞായറാഴ്ച്ചയാ കെട്ടൊ.. രോഹിണി മുഖം വീര്‍പ്പിച്ചു.

സിനിമയിലെ ദുബായി രോഹിണിക്കു അപരിചിതമായിരുന്നില്ല..ഫിഷ്‌ മാര്‍ക്കെറ്റും ക്രീക്കും,പിന്നെ അ ബോട്ട്‌ യാത്ര പോലും അവളുക്ക്‌ നിത്യകാഴ്ച്ച പോലെ...ജബെല്‍ അലിയിലേക്കു പോകാനുണ്ടെന്നു കള്ളം പറയുന്ന ഉപനായകനെ നല്ല പരിചയം തോന്നി..

ദിവസങ്ങള്‍ എത്ര പെട്ടെന്നാണു തീറ്‌ന്നു പോകുന്നത്‌.പെട്ടിയിലെ സാധനങ്ങള്‍ പോലെ .

'തിരികെ ഞാന്‍ വരുമെന്ന വാര്‍ത്ത കേള്‍ക്കാന്‍ എന്റെ ഗ്രാമം കൊതിക്കാറുണ്ടിന്നും..തിരികെ മടങുവാന്‍ ..തീരത്തണയുവാന്‍ ഞാനും കൊതിക്കാറുണ്ടെന്നും' സിനിമയിലെ ആ പാട്ടാണു രണ്ടു ദിവസമായി ചുണ്ടില്‍..

തീര്‍ച്ചയായും,..കുറച്ചു കൂടി കാശുണ്ടാക്കി വരു.. മഴയത്തു തലയാട്ടി നിന്ന വാഴകൂട്ടം പറഞ്ഞു .

വണ്ടി വന്നു.. മടക്കയാത്ര പതിവു പോലെ നിശബ്ദം

സില്‍ക്‌ എയറിലെ പെണ്‍കുട്ടിയുടെ കൃത്രിമവിനയത്തിന്റെ ചിറകിലേറി രോഹിണിയും ഭര്‍ത്താവും വീണ്ടും ,സൂര്യനെതിരെ ,ആകാശമാളം നോക്കി പറന്നകന്നു.

കിരണിന്റെ പാട്ട് ഇവിടെ: (തിരികെ ഞാന്‍ വരുമെന്നു..

വായനാ പങ്കു തരുമൊ?

2007-07-12T12:27:00.000+08:00

സ്നേഹിതരെ..

വായനപ്രിയരായ ബൂലോകരെ .. ഞങ്ങളുടെ കൊച്ചു book club -il പുസ്തകം തിരഞ്ഞെടുക്കാന്‍ ഒന്നു സഹായിക്കുമോ?

മലയാളത്തില്‍ പുതിയ (കഴിഞ്ഞ രണ്ടു വര്‍ഷത്തിനിടയില്‍) പ്രസിദ്ധികരിക്കപെട്ട കഥ /ലേഖന സമഹാരങ്ങളില്‍ (കവിത വേണ്ട ..താങ്ങൂല്ല)എന്തൊക്കെയാനെന്നു പറഞ്ഞു തരുമൊ? വായിക്കേണ്ടവരെ പറഞ്ഞു തരുമൊ? ആനുകാലികങ്ങള്‍ പതിവായി വായിക്കന്‍ പറ്റാത്തിനാല്‍ വിവരം കമ്മി.

പുതിയ എഴുത്തുകാരുടെ കൃതികളാണു ഉദ്ദേശിക്കുന്നതു...പഴയതെല്ലാം MT,zachariya,Sara joseph VKN,മുകുന്ദന്‍,സേതു ,മാധവികുട്ടി ഒക്കെ ഇവിടെ stock ഉണ്ടു, അല്ലെങ്കിലും ബുക്ക്‌ സ്റ്റാള്‍ അതൊക്കെ പ്രദര്‍ശിപ്പിക്കുന്നതു കൊണ്ടു പെട്ടെന്നു തിരഞ്ഞെടുക്കാം..പക്ഷെ പുതിയ എഴുത്തുകാരുടെ കൃതികള്‍ കാണാറുണ്ടേങ്കിലും നല്ലതാണൊ എന്നറിയാത്തതിനാല്‍ വാങ്ങാന്‍ മടിയാണു..

K.R Mallika ,Priya A.S , പിന്നെ? പിന്നെ....?..? തുടങ്ങിയവരുടെ പുസ്തകങ്ങള്‍ എവിടെ നിന്നു ലഭിക്കും?
വടക്കുംനാഥനെന്റെ നടയിലെ current books-ഇല്‍ കേവലം രണ്ടു മണിക്കൂര്‍ മാത്രമാണു പൊതുവെ ഈ തിരഞ്ഞെടുപ്പിനു കിട്ടാറുള്ളതു...'നിര്‍മലയും വിശാലനും' അവിടെ കാണുമെന്നു കരുതുന്നു..
വേറെ ബുക്ക്‌ സ്റ്റാള്‍ ?
ഇന്ദുലേഖ.കോം പോലെ വെറെ എതെങ്കിലും ലിങ്ക്സ്‌ അറിയാമൊ?

കഴിഞ്ഞ യാത്രയില്‍ പുസ്തകപ്രിയായ ഭാര്യയെ impress ചെയ്യാന്‍ ഭര്‍ത്താവ്‌ ഒന്നു ശ്രമിച്ചു..ഭാര്യയുടെ ലിസ്റ്റ്‌ നു പുറമെ പുതിയതു വാങ്ങാന്‍ വേണ്ടി ഒരു മലയാള സാഹിത്യക്കാരന്റെ പേരകുട്ടിയോടു ഏതൊക്കെയാണു വാങ്ങേണ്ടതെന്നു ചോദിച്ചു ......മല്ലിക യുനിസ് ,കമല ഗോവിന്ദ് കണ്ടാല്‍ വങ്ങാന്‍ മറക്കണ്ട എന്നു !

(അവനോടെനിക്കൊരു മൊഴി ചോദിക്കാന്‍ ബാക്കിയുണ്ട്‌ ..നിലവറയിലെ മുറിചുരിക ഇപ്പോഴും വിറയ്ക്കുന്നു)

പിന്നെ എന്റെ 6 മരുമക്കള്‍ CBSEക്കാര്‍ ..മലയാളം പത്രം പോലും വിക്കി വിതുമ്പി വായിക്കുന്നവര്‍ ..നീയിപ്പൊഴും വായിക്കുന്നുവൊ എന്നു നിറകണ്ണുകളോടെ ചോദികുന്ന സഹോദരി..ഹും..

അപ്പോള്‍ നല്ല വായനക്കാരായ മലയാളം ബ്ലോഗ്ഗെര്‍സിനോടു ചോദിക്കാം എന്നു തോന്നി ..ഒരു തിരഞ്ഞെടുപ്പിനു സമയം അധികം മറ്റു ലഭിക്കാനിടയില്ലാത്ത പ്രവാസി ബുക്ക്‌ ശേഖരണക്കാര്‍ക്കും പ്രയോജനപ്പെട്ട്ക്കും എന്നു തോന്നി..നിങ്ങള്‍ ഇഷ്ടപ്പെട്ട പുസ്തകം പറയൂ..എനിക്കിഷ്ടപ്പെടുമൊ എന്നു ചിന്തിക്കെണ്ട.....

സ്വര്‍ണകിങ്ങിണി

2007-04-09T18:35:00.000+08:00

'വിഷു വരുന്നുട്ടൊ' എന്നു നിശബ്ദമായി ആര്‍ത്തു വിളിച്ചുകൊണ്ടു
മാര്‍ച്ച്`-ഏപ്രില്‍ മാസങ്ങളില്‍ സിംഹപുരിയുടെ ഹൈ വേകളിലും റോഡ്‌ ഡിവൈഡറുകളിലും പൂത്തുലഞ്ഞു നില്‍ക്കുന്ന കണിക്കൊന്ന എനിക്കു ഗൃഹാതുരത്വം ഉണര്‍ത്തുന്ന ഒരു കാഴ്ച്ചയാണു`...ഇത്രനാളും ആരും കാണാതെ ശേഖരിച്ചു വച്ചിരുന്ന സ്വര്‍ണ നാണ്യങള്‍ നിര്‍‌ലോഭം വാരി ചൊരിയുന്ന ദാനശീലന്റെ ഭാവമാണു അപ്പൊള്‍ കണികൊന്നയ്ക്....ഒരു പക്ഷെ നാട്ടിലുള്ളതിനെക്കാള്‍ കൂ‍ടുതല്‍ കൊന്ന മരങള്‍ ഇവിടെ ഉണ്ട്.

-നാട്ടിലെ അക്കേഷ്യാ മരങ്ങള്‍ വെട്ടി മാറ്റി കൊന്നയും മറ്റും നടാന്‍ പോകുന്നു എന്നു വായിച്ചു..നല്ലതു! സാമൂഹ്യ വനവല്‍ക്കരണത്തിന്റെ മുഖം മിനുക്കല്‍ കേരളതിന്റെ മുഖശ്രീ തെളിയിക്കട്ടേ
..കര്‍ണ്ണികാരം പൂത്തു തളിര്‍കട്ടെ..അവര്‍ വേനല്‍ ചൂടില്‍ സ്വര്‍ണം ഉരുക്കി കിങ്ങിണി പണിയട്ടെ !

മത്താപ്പൂ വെളിച്ചത്തില്‍ മിന്നിമറയുന്ന ഓര്‍മ്മകളില്‍ ഒരു പാടു വിഷുകാലങ്ങള്‍ .നന്നെ വെളുപ്പിനു ഉമ്മറത്തു അലങ്കരിച്ച കൂട്ടില്‍ ചെറിയ ഒരു കൃഷ്ണനെയും വച്ചിട്ടു മാറി നിന്നു "രാധ മാധവ ഗോപാല ..എന്നു ഭജന പാട്ടു പാടി വീട്ടുകാരെ ഉണര്‍ത്തി, കണികാട്ടിയിരുന്നു അന്നു ഭജനമഠത്തിലെ ചെറുപ്പക്കാര്‍,അവര്‍ക്കു കുറച്ചു ചില്ലറ തടയുന്ന വഴി..അന്നു അതു ഉറക്കം മാറാത്ത കുഞ്ഞി കണ്ണുകളുക്ക് ഒരു പുലര്‍ക്കാല സുന്ദര സ്വപനം പോല , മറക്കാനാവാത്ത, വിഭ്രമിപ്പിക്കുന്ന മായ കാഴ്ചകള്‍ കൊണ്ടു പോലും കാലത്തിനു മായ്ക്കാനാകാത്ത ,കാഴ്ചയായി.

-പിന്നീടു ഒരോ കാഴ്ച്ചയും കാണലിന്റെ സാരംശം ചോര്‍ത്തി കളഞ്ഞു എന്നു പറയണൊ..ഛെ വേണ്ട

പ്രവാസജീവിതത്തില്‍ ആദ്യം വന്ന ആഘോഷവും വിഷു ആയിരുന്നു,ചെറിയ തോതിലെങ്കിലും എല്ലാം ഒരുക്കണം എന്നു വിചാരിച്ചു ...കുട്ടികള്‍ ഒന്നും മറന്നു പോവരുതല്ലൊ..വീടിനടുത്തുള്ള ജോഗ്ഗിംഗ്‌ ട്രാക്കില്‍ നിരന്നു നില്‍കുന്ന കണികൊന്ന മരങ്ങള്‍ ആദ്യെ നോട്ടമിട്ടു വച്ചിരുന്നു .വിഷു തലേന്നു സന്ധ്യയുടെ നേര്‍ത്ത ഇരുട്ടിന്റെ മറപിടിച്ചു ,ഒരു പാടു പൂക്കള്‍പറിച്ചു കൊണ്ടു വന്നു.പഴങ്ങളും സ്വര്‍ണവും കസവുനേര്യതും ഒക്കെ ചേര്‍ത്തു ഒന്നു രണ്ടു വര്‍ഷം കണി വച്ചു.ഒരു പക്ഷെ അത്രയും പൂക്കള്‍ നാട്ടില്‍ പോലും കിട്ടിയിരുന്നില്ല..

തിരുവനന്തപുരത്തു താമസികുമ്പോള്‍ ഒരു ചെറിയ കൊന്ന പൂ തണ്ടും പച്ച കശുവണ്ടിയും കണ്ണിമാങ്ങയും ചേര്‍ത്തു കെട്ടി 5 രൂപയ്ക്കു തരുന്ന, ഞങ്ങളുടെ മില്‍മ പാല്‍കാരന്റെ നിര്‍ബന്ധിത പാക്കെജ്‌ ആണു, വിഷു കണിക്ക് ഉപയോഗിച്ചിരുന്നത് .ആശയൊടെ നട്ട കൊന്ന പൂവിടുന്നതിനു മുന്‍പെ അനന്ത പുരി വിട്ടു സിംഹപുരിയിലെക്കു പോരേണ്ടിയും വന്നു

പക്ഷെ ഒന്നു രണ്ടു വര്‍ഷം കഴിഞ്ഞപ്പോള്‍ ആ വമ്പന്‍ മരങ്ങള്‍ parks board വെട്ടി മാറ്റി..അശോകം നട്ടിരിക്കുന്നു അവിടെ....ഈ ശ്രദ്ധ യാണി ദീപിനെ നിത്യ ഹരിതയാക്കുന്നതു... അത്തവണ ഞങ്ങള്‍ കണികൊന്ന തിരഞ്ഞു കുറെ ദൂരെയുള്ള പാര്‍ക്കില്‍ പോയി. ഒരു പാടു കൊന്ന മരങ്ങള്‍ അവിടെ ഉണ്ടു ,പലതും ഉയരത്തില്‍ , അതു പറിച്ചു ഫൈനടിയും ചൂരലടിയും ചാംഗി വാസവും ഒന്നും വയ്യ എന്നായി പ്രിയംവദന്‍

-അത്തവണ കണി വച്ചതു ഫ്ലവര്‍ ഷോപ്പില്‍ നിന്നും വാങ്ങിയ മഞ്ഞ ഓര്‍ക്കിഡുപൂകുലകളായിരുന്നു!

ഒന്നു അഡ്ജസ്റ്റ്‌ ചെയ്യെന്റെ കൃഷ്ണന്‍ കുട്ട്യെ.....നമുക്കീ ജനലീ കൂടെ ദൂരെ റോഡിലേക്ക് നോക്കിയാല്‍പോരെ ,നിറയേ പൂത്തുലഞ്ഞു നില്‍ക്കുകയല്ലെ ഇമ്മടെ കൊന്ന പെണ്ണു ,എന്തൊരു ഭംഗിയാ അല്ലെ? ഒരില ഉണ്ടൊ? ..നമുക്കിങ്ങനെ മരത്തിലേക്ക്‌ നോക്കിയാല്‍ പോരെ ..വെറുതെ ആ പൂവു പറിച്ചെടുക്കണൊ....ഇതൊരു 'ഫൈന്‍ സിറ്റി 'ആണെന്ന കാര്യം നിനക്കറിയില്ലെ? അല്ലെങ്കിലും അതിങ്ങനെ ദൂരെ കാണാനാണു ഭംഗി അല്ലെ ? ഞാന്‍ പറഞ്ഞു.....
-കൃഷ്ണണന്‍ ചിരിച്ചു ,ഗുരുവായൂര്‍ നിന്നു കൊണ്ടു വന്നപ്പോള്‍ ഉള്ള അതെ ചിരി..അഭ്യര്‍ത്ഥനകളും ഭീഷണിയില്‍ അവസാനിക്കുന്ന അപേക്ഷകളും പിന്നത്തെ അനുനയങ്ങളും സമവായങളും ..എല്ലാം എത്ര കണ്ടതാ ..പാസ്സ്‌പ്പോര്‍ട്ട്‌ എടുക്കാന്‍ മറന്നു ..ഇവിടെ പെട്ടു പോയി ഇനി പറഞ്ഞിട്ടെന്താ എന്നല്ലെ ആ കള്ള ചിരിയുടെ അര്‍ത്ഥം?

പക്ഷെ കൃഷ്ണന്‍ അതു ശരി വച്ചു എന്നെനിക്കു ആ വാരാന്ത്യത്തില്‍, വിഷു സദ്യക്കുള്ള പായസവുമായി കൂട്ടുകാരിയുടെ വീട്ടിലേക്കുള്ള യാത്രയില്‍ മനസ്സിലായി .. എക്സ്പ്രസ്സ്‌ വേ യില്‍, കിലോമീറ്ററുകളോളം ദൂരം പൂത്തുലഞ്ഞു നില്‍കുന്ന കണി കൊന്ന ...അതൊരു അപൂര്‍വസുന്ദരമായ വിഷു കാഴ്ചയായിരുന്നു

-ഇവിടെ എല്ലാം കിലോമീറ്റര്‍ കണക്കിലെ ഉള്ളു ,ഒരു km അശോകം ,2 km ഇലഞ്ഞി,1/2 km ചെമ്പകം.. വീട്ടില്‍ ഒരേ പോലത്തെ ചെടികള്‍ നിരത്തിയ ചട്ടികള്‍ക ണ്ടാല്‍ എന്റെ ഒരു അനന്തിരവന്‍ ചോദിയ്കുമായിരുന്നു എന്താപ്പാ ഇതു 'ക്ലോണിങ്ങോ'ന്നു`? ഒരേ തരം പൂചെടികളുടെ നീണ്ട നിര നയനസുഖം തരുന്നുവെങ്കിലും , ലാന്‍ഡ്സ്സ്കേപ്പിങ്ങില്‍ ക്രിയാത്മകതയുടെ അഭാവം:‘ക്ലോണിങ്ങിന്റെ‘ കടന്നുകയറ്റവും നൈര്യന്തികത സൃഷ്ടികുന്ന ആവര്‍ത്തന വിരസതയും നഷ്ടമാകുന്ന ആകസിമികതയും എന്നൊ മറ്റൊ ഒരു തീസീസ്സിനും വകുപ്പുണ്ടാക്കുന്നുണ്ട്..

പിന്നെയും വര്‍ഷങ്ങള്‍ കഴിഞ്ഞപ്പോള്‍ ഞങ്ങള്‍ രണ്ടു പേരും (ഞാനും കൃഷ്ണനും ട്ടോ) പ്രയോഗികത തികഞ്ഞ പ്രവാസികളായി മാറി.ഓര്‍ക്കിഡ്‌ പൂജാ പുഷ്പ്പങ്ങളും മാലയും ഓണ പൂക്കളവും ഒക്കെ പരിഭവമില്ലാതെ പരിചയിച്ചു.വിഷുത്തലേനാള്‍ ഇപ്പോ കണിവെള്ളരി വാങി വരൂ എന്നു വാ‍ശി പിടിക്കാ‍റില്ല ,കണികൊന്ന തേടി അലയാറില്ല ,പ്രവാസത്തിന്റെ പ്രയോഗികപാഠങ്ങളുടെ പരിശീലന കളരി ഇതിനൊരു ശാശ്വത പരിഹാരം കണ്ടുപിടിച്ചു തന്നു.. ഇപ്പോള്‍ കുറെ വര്‍ഷങ്ങളായി ഇങ്ങനെയാണു കണികാണുന്നത്..

ബങ്കൊക്കിലെ സുവാന്‍ ലം നൈറ്റ്‌ മാര്‍‌ക്കറ്റില്‍ നിന്നും വാങ്ങിയ ഈ വടാത്ത ,ഉതിരാത്ത കണികൊന്നയും ഫുജി ആപ്പിളും കൊറിയന്‍ ഹണി മാ‍ങയും ഒക്കെ കാണും ആ പഴയ ഉരുളിയില്‍.

നേര്‍ത്ത പുലരി വെളിച്ചത്തില്‍ ,ദൂരെ ,എനിക്കും കൃഷ്ണനും മാത്രം ആ സ്വര്‍ണമഞ്ഞ നിറം തിരിച്ചറിയാം.

കേരളത്തിന്റെയും തായിലാന്‍ഡിന്റെയും ദേശീയ പുഷ്പം കണികൊന്നയായതും ,അവിടെ വിഷു ദിനം മറ്റൊരു പേരില്‍ ആഘോഷിക്കുന്നതും ,രസകരമായ യാദൃച്ഛികത? അവിടെ ഒരു ബുദ്ധക്ഷേത്രത്തില്‍ സ്വര്‍ണം പൊതിഞ്ഞ ബുദ്ധന്റെ പ്രഭയോടു മല്‍സരിക്കാനെന്ന പോലെ പൂത്തുലഞു നിന്ന ആ കണികൊന്നയും ഒരു നല്ല ഓര്‍മ.

.
.
.
.

അനുബന്ധം:അടുക്കളയില്‍ കേട്ടതു...
അമ്മ: മോളെ ആ ദോശ ഒന്നു മറിച്ചിട്ടെ

മോള്‍: .എവിടെ spatula അമ്മെ?

അമ്മ: ചട്ടുകം അവിടെ തൂങ്ങി കിടകുന്നതു കണ്ടില്ലെ?

മോള്‍: Oh yaa.. sorry amma...Can I flip it ? I think all the holes appeared ..

അമ്മ: ..ya..can ..മോളെ അടുത്ത sunday വിഷുവാണ്‌..

മോള്‍:.. Oh God.. Do I ve to get up early ..oh no ..അമ്മാ

അമ്മ: കണികണ്ടിട്ടു വേണെങ്കില്‍ ഉറങ്ങിക്കൊ .

മോള്‍ :Can I see kaNi some time later ,i mean @ 9 or so...its sunday maa..The only day I can get up late..

അമ്മ:..ഏയ് അതു ശരിയാവില്ല

മോള്‍:.. Any way ..I like this vishu ,..Amma... how much you are planing this year? I mean vishukaineetum.

അമ്മ:.പോ അവിടന്നു .അങ്ങിനൊന്നും കുട്ടികള്‍ ചോദിക്കാന്‍ പാടില്ല

മോള്‍: ഹി ഹി ...oh ya അമ്മാ... Are we going to Nikitha's house or Remya's this time with paayasam and curries for sadya? Or are they coming here this time?

അമ്മ:..We are going to sindhu aunty this time ..ഈ തവണ ഞാന്‍ ഓലനും അവിയലും ആണു ഞാന്‍ കൊണ്ടു പോകുന്നതു..

മോള്‍: What ever ....Can I ask you one question?

അമ്മ.. umm

മോള്‍: Why amma all vishu -Onam weekend you take the trouble to prepare kerala food and serve in vazhaila with your 'malayalam' friends?

അമ്മ: ..നിങ്ങളിതൊക്കെ മറക്കാതിരിക്കണല്ലൊ..പിന്നെ ഇവിടെ തനിയെ സദ്യ കഴിച്ചാല്‍ എന്താ ഒരു രസം?

മോള്‍: ..Its ok maa ,I don't like സദ്യ so much , just give us വിഷുകൈനീട്ടം ,No need to struggle yourself.

അമ്മ: (ആതമഗതം )ങെ? എത്ര ഫോണ്‍ വിളികള്‍..ഒരോ വീട്ടുകാര്‍ക്കും ആയാസം തുല്യമാവാനും വിഭവങളില്‍ കേരള തനിമ നിലനിര്‍ത്താനുമുള്ള ബദ്ധപ്പാടുകള്‍ ,വേദി നിര്‍ണ്ണയ ചര്‍ച്ചകള്‍ ,എങ്കിലും അവസാനം ചില കണ്‍ഫ്യൂഷനുകള്‍, തിരക്കിട്ട ലിറ്റില്‍ ഇന്ത്യ സന്ദര്‍ശനം...വാഴയില വാങ്ങല്‍...കാര്‍ത്തിക സ്റ്റോറിലെ കേരള പപ്പടം ഒക്കെ ആര്‍ക്കുവേണ്ടിയായിരുന്നോ?..ചെറിയ കുട്ടികളുക്കു വേണ്ടിയോ ..മുതിര്‍ന്ന കുട്ടികളു വേണ്ടിയോ..ഹും..

അമ്മ (പ്രകാശം)..ദോശ കരിയുന്നെടി മോളെ!

രസമുകുളങ്ങള്‍!!

2007-01-06T15:11:00.000+08:00

അന്നു മൂന്നു വയസായ ABCD ഇനിയും പഠിച്ചിട്ടില്ലാത്ത ,ഒട്ടും തന്നെ ഭക്ഷണപ്രിയയല്ലാത്ത എന്റെ കുട്ടിയ്ക്കു Mac Donold ഇന്റെ സൈന്‍ ബോര്‍ഡ്‌ ദൂരെ നിന്നുതന്നെ കാണാനും വിശക്കുന്നു എന്നു പറയാനുമുള്ള ആന്തരിക ചോദന എന്തായിരുന്നു? പിസ്സയും KFC യും ഇത്രമേല്‍ പഥ്യമാവുന്നതെന്തെ? .പിസ്സായും ബര്‍ഗെറും നാടന്‍ രുചികളെ ഇത്ര പെട്ട്ന്നു ,പ്രതേയ്‌കിച്ചു കുട്ടികളെ കീഴടക്കുന്നതിന്റെ "ഗുട്ടന്‍സ്‌" എന്താണു? ചീസ്‌ ,oregano ,rosemary ഒക്കെ തൈരിനും ജീരകത്തിനും കരിവേപ്പിലക്കും മേല്‍ കടന്നു വന്നു ഇങ്ങനെ പിടി മുറുക്കുന്നതെന്തെ? ..ഇന്നും നിക്കൊരു പുടീല്ല ..ആരെങ്കിലും ഗവേഷണം നടത്തിക്കാണുമോ എന്തൊ..എല്ല നാട്ടിലും ഇങ്ങനെയണൊ എന്നു ചോദിച്ചാലും വല്ല്യ പുടീല്ല. എവിടെ തിരിഞ്ഞങ്ങു നോക്കിയാലും അവിടെല്ലാം ചായകടയുള്ള ,ഭക്ഷണം കഴിക്കല്‍ "നാഷണല്‍ " ടൈം പാസ്സ്‌ ആയിട്ടുള്ള സിംഗപ്പൂരിലെ അവസ്ഥ ഇതാണു.

..ആഗോളവല്‍ക്കരണത്തിന്റെ സല്‍ഫലങ്ങള്‍ മാത്രം മതിയൊ?..അതിന്റെ ഉപോല്‍പ്പന്നങ്ങള്‍ കൂടി അനുഭവിയ്ക്കൂ എന്നരോ കളിയായി പറയുന്നുണ്ടൊ? ..കാലത്തിനൊത്ത രസന എന്നും ...മാറാന്‍ ശ്രമിക്കു എന്നും ? .. ഇതൊക്കെ ഒരു convenient ഫുഡ്‌ നിലയില്‍ ഞാനും ചിലപ്പൊഴൊക്കെ ആസ്വദിക്കാറുണ്ടു.എങ്കിലും എപ്പൊഴും പഴയ രുചികളിലേക്കു തന്നെ തിരിച്ചുപോകുന്നു....

എന്റെ കുട്ടിക്കാല ചരിത്രം പരിശോധിച്ചാല്‍ ഞാനൊരു ഭക്ത ആയിരുന്നുവെന്നു കാണം .വീട്ടിലെ ചെറിയ കുട്ടി എന്ന പരിഗണന പിടിച്ചു വാങ്ങി, രണ്ടു ശബരിമല യാത്ര ,ആലുവ മണല്‍പ്പുറത്തെ അസംഖ്യം ബലിയിടലുകള്‍ , ഉത്സവങ്ങള്‍ ഇതിലൊക്കെ അച്ഛന്റെ കൈയില്‍ തൂങ്ങി പോയിട്ടുണ്ടു. ..മറ്റു നാലു സഹോദരങ്ങള്‍ എന്നില്‍ നിന്നും മിനിമം ഒരു എട്ടു 'പ്രകാശ' വര്‍ഷം അകലെ ആയിരുന്നു...അതിനാല്‍ ഈ പാവം 'വാല്‍നക്ഷത്രത്തിനു' മേല്‍ അസൂയാലുക്കളും .ആശ്രമം കടവില്‍ നിന്നുള്ള വഞ്ചിയില്‍ ആലുവാപ്പുഴക്കു മറുകര കടന്നു അച്ഛന്റെ അകന്ന ബന്ധുവിന്റെ ബലിപുര കണ്ടുപിടിച്ചു ബലിയിടാന്‍ വേണ്ടികുളിക്കുന്ന മാതാ-പിതാശ്രികളുടെ വസ്ത്രങ്ങള്‍ക്കു കാവലിരിക്കല്‍ , തല്‍ക്കാലികമയി വളച്ചുകെട്ടിയ അമ്പലത്തിലിരിക്കുന്ന ശിവപെരുമാളിനെ തൊഴല്‍ ,അമ്മയുടെ കല്‍ച്ച്ട്ടി & വിശറി വാങ്ങല്‍ എന്നിങ്ങനെയുള്ള mundane activities കൂട്ടുനില്‍ക്കാന്‍ എന്നെ പ്രേരിപ്പിച്ചിരുന്നതു, യാത്ര ചെയ്യാനും പുറം ലോകം കാണാനും ഉള്ള അപൂര്‍വം അവസരം എന്നതു മാത്രമല്ല പിന്നയൊ , ഏതെങ്കിലും സാമിയുടെ കടയില്‍ കയറി ഇഡ്‌ലിയും വെള്ള ചട്ട്‌ണിയും സമ്പാറും പിന്നെ സ്പെഷല്‍ ലഡുവും കഴിയ്ക്കാം എന്നതും കൂടിയാണെന്നതു, എന്റെ സഹോദര ശത്രു ഗാങ്ങിന്റെ അസൂയ കലര്‍ന്ന കുപ്രചരണം മാത്രം. അതുപിന്നെ എന്റെ വീട്ടിലെ പതിവു പ്രാതല്‍ കഞ്ഞി.. ,അന്നൊക്കെ സാദ കൊച്ചിക്കാരുടെ പ്രിയപ്പെട്ട പതിവതായിരുന്നു ,5 പേര്‍ പഠിക്കാനും മാത പിതാശ്രീകളുക്കു ജോലിക്കും പോകണമല്ലൊ . അവധി ദിവസങ്ങളില്‍ പരന്ന സ്റ്റീല്‍ പാത്രത്തില്‍ ഉണ്ടാക്കി മുറിച്ചെടുക്കുന്ന ഇഡ്‌ലിയുടെ സ്വാദിനെ റേഷന്‍ അരിയുടെ ഗുണനിലവാരവും ,ചേച്ചിമാരുടെ ദേഷ്യവും,..അരി ആട്ടെണ്ടി വന്നതിന്റെ.. ദോഷകരമായി ബാധിച്ചിരുന്നു എന്നു വേണം കരുതാന്‍.

അതൊക്കെ എത്ര കുഞ്ഞു മോഹങ്ങള്‍!! ഇപ്പോള്‍ ഇവിടെ ഞങ്ങളുടെ അവധി ദിവസങ്ങളിലെ പ്രഭാത നടത്തയക്കു നു മോളെ കൂട്ടുന്നതു ബ്രേക്ക്‌ ഫാസ്റ്റ്‌ നു Mac പോകാം എന്ന കൈകൂലി വഗ്ദാനത്തിന്‍ന്റെ പിന്‍ബലത്തിലാണു..നടന്നു കുറച്ചതെല്ലാം പൂര്‍വ്വാധികം ഭംഗിയൊടെ ശരീരത്തില്‍ തിരിച്ചെത്തിച്ചു ഒരു മടക്ക യാത്ര. എങ്കിലും അവളുടെ കൊച്ചുവര്‍ത്താങ്ങള്‍ കേള്‍ക്കുവാനുള്ള അവസരം എന്ന നിലയില്‍ ആസ്വദിക്കാറുണ്ടു. മാസത്തിലൊരു പിസ്സാ ഡെലിവറി ഒരു നൊം ആയി മറി..ഫീല്‍ഡ്‌ ട്രിപ്‌ ,ടൂഷന്‍ ഇടവേളകള്‍ KFC & ബര്‍ഗര്‍ കിംഗ്‌ കൈയടക്കി.

നാട്ടിലും ഇപ്പൊള്‍ പിസ്സാക്കാലം ,പ്രതേയ്‌കിച്ചു പട്ടണ ക്യാമ്പസ്‌-ഇല്‍ കുറെക്കാലം അരങ്ങു തകര്‍ത പൊരോട്ടയും ചിക്കണും ഔട്ട്ഡേറ്റ്ഡെന്നു സ്വലേ യും പറയുന്നു.

എന്റെ വീട്ടിലെ ഷെല്‍ഫിലും ഇപ്പൊ cheese , alfredo സ്ഥാനം പിടിച്ചിരിക്കുന്നു . രുചികരമായ കട്‌ലെറ്റിനെപ്പോലും പിന്തള്ളി ബര്‍ഗര്‍ ! ഇടക്കാലത്തു പോപ്പുലര്‍ ആയിരുന്ന പനീര്‍ കറികളെയും ബട്ടുരയെയും സ്പാഗെറ്റിയും പൊട്ടൊറ്റൊ റോസ്റ്റിയും നിലം പരിശാക്കിയിരിക്കുന്നു. ചീസ്‌ ദോശ ,ചീസ്‌ പൊരോട്ട ..കടകളിലും ഫൂഷന്‍ തരംഗം .

ഈ തരംഗത്തിനിടയിലും രസകരമായ ഒരു കാര്യം കണ്ടു .ഇവിടെത്തെ ന്യൂസ്‌ പേപ്പറില്‍ വരുന്ന പ്രശസ്തരുടെ പ്രിയപ്പെട്ട ഭക്ഷണവിഭവങ്ങളെ പറ്റിയുള്ള വരാന്ത ഇന്റര്‍വ്യൂ ഇല്‍ അവസാന ചോദ്യം "എന്തായിരിക്കണം നിങ്ങളുടെ 'ലാസ്റ്റ്‌ മീല്‍'" എന്നതാണ്‍ . exotic ഭക്ഷണം പാകം ചെയ്യുന്ന ഷെഫുകള്‍ പോലും ലളിതമായ കുട്ടിക്കാല ഭക്ഷണങ്ങളാണു ലാസ്റ്റ്‌ മീല്‍ ആയി പറഞ്ഞിരുന്നതു !

ഈ ചോദ്യം ഇയിടെ വീട്ടില്‍ ചോദിച്ചപ്പോള്‍ എന്റെ സീമന്ത പുത്രി പറഞ്ഞ മറുപടി , അമ്മയുണ്ടാക്കുന്ന ചമ്പ ഒണക്കലരി കഞ്ഞിയും ,പയറുപ്പേരിയും , ഇഞ്ചി & തക്കാളി വഴറ്റി തേങ്ങ ചേര്‍ത്തരക്കുന്ന ചമ്മന്തിയുമാണെന്നതു എന്നെ ആനന്ദതുന്ദിലയാക്കി (വാക്കു ശരിയല്ലെ? ) ബഹുരാഷ്ട്ര കുത്തകള്‍ക്കും മോഹന്‍ലാലിനും കിഴടക്കാനാവാത്ത Tastebuds -രസമുകുളങ്ങള്‍? ഇപ്പോഴും അവശേഷിക്കുന്നു....

ആശ്വാസം.

വട്ടയപ്പവും താറാവുകറിയും പിന്നെ കുറെ സംശയങ്ങളും

2006-12-20T14:06:00.001+08:00

എന്റെ കുട്ടിക്കാലത്ത്‌ ക്രിസ്തുമസ്‌ അടുക്കുമ്പോള്‍ എനിക്കു ചില ടെന്‍ഷ്ന്‍ അനുഭവപ്പെടാറുണ്ട്‌.23 -24 തീയതികളില്‍ അതു പാരമ്യത്തിലെത്തും." മണീടമ്മേ എന്നു നീട്ടി വിളിച്ചുകൊണ്ടു അച്ചപ്പവും അവലോസുണ്ടയും കള്ളൊഴിച്ചുണ്ടാക്കിയ വട്ടയപ്പവുമയി തെക്കേലെ കര്‍മ്മലി താത്തിയോ, പടിഞ്ഞാറേല വിരോണി താത്തിയൊ ( മുതിര്‍ന്ന ക്രിസ്തിയാനി സ്ത്രീകളെ കൊച്ചിയില്‍ വിളിക്കുന്നതുങ്ങനെയാണു ) പടി കടന്നുവരുന്നതുവരെ ഈ ടെന്‍ഷ്യന്‍ തുടരും. കിഴക്കേല ലൂസി ടീച്ചര്‍ ക്രിസ്തുമസ്സിന്റെ അന്നു രാവിലെയാ വേലിക്കുമുകളിലുടെ പാലപ്പവും ഇഷ്ടുവും (stew) തരിക.പിന്നെ കണ്ണൂര്‍കാരന്‍ കുമാരേട്ടന്റെ പള്ളിപ്പടിലെ ബെസ്റ്റ്‌ ബേക്കറിയിലെ കേകും ,അമ്മയുടെ ബെസ്റ്റ്‌ ഫ്രണ്ട്‌ -ന്റെ വീട്ടിലെ സ്റ്റാര്‍ ഐറ്റെം കുഴലപ്പം കൂടി എത്തിയാല്‍ ഞങ്ങളുടെ വീട്ടിലും ക്രിസ്തുമസ്‌ പൊടിപൊടിക്കും.

പക്ഷെ ഓണത്തിനാണു ഞങ്ങള്‍ വിവരം അറിയുക, ഭൂരിപക്ഷത്തിന്റെ ഇടയില്‍ താമസിക്കേണ്ടി വരുന്ന നൂനപക്ഷത്തിന്റെ സുഖമുള്ള നൊമ്പരങ്ങള്‍ . പായസവും ഉപ്പേരിയും ഒപ്പിക്കാം..അച്ചനും ചേട്ടനും സഹായിക്കും. ഉദ്യോഗസ്ഥയായ അമ്മക്കു കൂടുതലും നുണ പാചകങ്ങളാണുപരിചയം .മത്തങ്ങാപിടിയും ,ഇലയടയും ,അവലോസുപൊടിയും വരെ ഉള്ളു പലഹാര വിജ്ഞാനം , എന്നാല്‍ അതൊന്നും പുറത്തു കണിക്കാതെ ,സമയംകുറവു ഭാവിച്ചു അമ്മ സ്റ്റ്രാറ്റജി വര്‍ക്ക്‌ ഔട്ട്‌ ചെയ്യും , വിതരണത്തിനാവശ്യമായ പലഹാരങ്ങളുടെ നിര്‍മാണം ഔട്ട്‌ സോഴ്സ്‌ ചെയ്യപ്പെടും . കര്‍മിലി താത്തിയെ ബുക്ക്‌ ചെയ്യും . പശുവിനെ പറമ്പില്‍ കെട്ടി തൊഴുത്തിന്റെ ഒരു വശം വൃത്തിയാക്കി വലിയ അടുപ്പുകൂട്ടി പെട്ടെന്നു ഒക്കെ ഉണ്ടക്കി ത്തന്നു അവര്‍ സ്ഥലം വിടും .ചേച്ചിമാരൊ ഞാനോ വിതരണത്തിനു പോകും .

ഒരു തവണ, അപ്പോഴേക്കും കോളേജ്‌ കുമാരികളായി മാറി കഴിഞ്ഞിരുന്ന ചേച്ചിമാര്‍ പ്രമേയം പസ്സാക്കി ..കുറെ ദൂരെ പോയുള്ള വിതരണം നിറുത്തലാക്കാം. റോഡില്‍ കൂടി സഞ്ചിയുമായി പോകനുള്ള മടി. അവര്‍ എന്നോടു പറഞ്ഞു നീ ഇന്നു ഇതു കൊടുത്തിട്ടു, അമ്മയുടെ കൂട്ടുകാരി മേരിചേച്ചിയോടു .."നമുക്കി പരിപാടി അവസാനിപ്പിക്കാം "എന്നു പറയണം . തികഞ്ഞ പ്രതിഷേധം ഉണ്ടെങ്കിലും ഞാന്‍ അതു വളരെ matter of fact ആയി ചട്ടയും മുണ്ടും ഉടുതു നിറഞ്ഞ ചിരിയോടെ നില്‍ക്കുന്ന അവരൊടു ഞാന്‍ പറഞ്ഞു അതു പോലേ പറഞ്ഞു.. പെട്ടെന്നവരുടെ മുഖം മങ്ങി..ഒന്നും പറയാതേ എനിക്കു 2 രൂപയും തന്നു യാത്രയാക്കി.

വീട്ടില്‍ തിരിച്ചു വന്നപ്പൊ ചേച്ചിമാരു വളഞ്ഞു ..നീ പറഞ്ഞൊ? ."ഉവ്വ്‌" എന്നു ഞാന്‍..അവരെല്ലാവരും പൊട്ടിച്ചിരിച്ചു ..നിനക്കതു പറയന്‍ ധൈര്യം വന്നോ ? ഞങ്ങള്‍ വെറുതെ പറഞ്ഞതല്ലേ എന്നു...ങെ?!!"ഇതു ചതി ,കൊല ചതി" ,എന്റെ മനസ്സു പറഞ്ഞു..കുട്ടികുരങ്ങനെ കൊണ്ടൂ ചുടു ചോറു വാരിക്കുന്ന പണി..ദുഷ്ടകള്‍..
അടുത്ത ക്രിസ്തുമസിനു അവര്‍ കൊണ്ടുവന്നെന്നും ഞങ്ങള്‍ ഓണത്തിനു പിന്നീടു കൊടുത്തില്ല എന്നുമാണു ഓര്‍മ.
മത സൗഹാര്‍ദത്തിന്റെ ആ ബാബറി മസ്ജിദ്‌ പൊളിക്കാന്‍ ഞാന്‍ ഒരു കറ്സേവക ആയതോര്‍ത്താണിപ്പോഴും എനിക്കു സങ്കടം..

വീണ്ടും ക്രിസ്തുമസ്‌
..ഇപ്പൊ എനിക്കു സകറിയയുടെ കഥയിലെ ആഷയെ പോലെ ഒരു പാടു സംശയങ്ങള്‍..

ക്രിസ്തുമസ്‌ നക്ഷത്രമുണ്ടാക്കാന്‍ മുള വാരി വെട്ടുന്ന ആ ഇല്ലികൂട്ടം ജോസ്പ്പേട്ടന്റെ വീടിന്റെ കുളക്കരയില്‍ ഇപ്പൊഴും ഉണ്ടൊ?

വാഴവെട്ടി മുറ്റത്തു നാട്ടി ക്രിസ്തുമസ്‌ വിളക്കു വയ്ക്കാറുണ്ടൊ ജോണി കുട്ടി?

ഗുജറാത്തില്‍ ചെമ്മീന്‍ കമ്പനിയില്‍ പണിക്കു പോയ മോളികുട്ടിക്കു കൊടുത്തയക്കാന്‍ എടുത്തു വച്ച പലഹാരങ്ങള്‍ കട്ടുതിന്നതിനു പ്രാഞ്ചിയെ പുരക്കു ചുട്ടും ഓടിക്കുന്ന ,അവന്റെ അമ്മാമ്മയിപ്പോഴും ഉണ്ടോ ?പ്രാഞ്ചിടെ മകനാവില്ലെ ഇപ്പൊ കള്ളന്‍ ?

ക്രിസ്തുമസ്‌ കരോളിനു (അതുണ്ടെങ്കില്‍) ഉണ്ണിശ്ശൊടെ മാതാവാകുന്നതു ആ സുന്ദരികോത റീനാമ്മേടെ മകളായിരിക്കില്ലെ ?

ആ താറാവുകാരന്‍ ക്രിസ്തുമസിനും ഈസ്റ്ററിനും ഇപ്പൊഴും താറാകൂട്ടവുമയി വരാറുണ്ടൊ? തെങ്ങിന്‍ കട്ക്കല്‍ 2 ദിവസം കെട്ടിയിട്ടു വയറ്റിലെ ചെളി കളഞ്ഞാണൊ കറിവയ്കുന്നേ? തേങ്ങ വറുത്തരച്ചാണൊ അതൊ റോസ്റ്റാണൊ ? എനിക്കു വറുത്തരകുന്നതാണിഷ്ടം

കര്‍മിലിത്താത്തി ഇപ്പൊഴും കള്ളൊഴിച്ചു വട്ടയപ്പം ഉണ്ടക്കാറുണ്ടൊ? എങ്കില്‍ ഇപ്പൊല്‍ കിട്ടുന്ന "ആന മയക്കി " ഒഴിച്ചുണ്ടാക്കിയാല്‍ അതിന്റെ പ്രത്യാഘാതം എന്താവും.?
ചവരൊ ചേട്ടനും കുംബാരിക്കും പിന്നെ ഷാപ്പില്‍ പോകേണ്ട ആവശ്യം വരില്ലെ?
ഇപ്പൊ ബേകറീല്‍ കിട്ടുന്ന ഈ വട്ടയപ്പത്തിനിപ്പോല്‍ പഴ സ്വാദുമായി വിദൂര സാമ്യം പോലും ഇല്ലാത്ത്തെന്തെ? ..കള്ളുമായി വിദൂര ബന്ധം പോലും ഇല്ലാത്തതാണൊ കാരണം?

പിന്നെ ദീപേടമ്മെ... (ഇപ്പൊ അവിടെ മണീടമ്മ ഇല്ലല്ലൊ ) എന്നു വിളിച്ചു ഇപ്പൊഴരെങ്കിലും പലഹാരപാത്രങ്ങളു മായി വരാറുണ്ടൊ ?

ഇതെല്ലാം ചിലതു മാത്രം ..ആരോടു ചോദിക്കാന്‍?

ഇലഞ്ഞി പൂ മണം ഒഴുകി വരുന്നു ..

2006-12-14T21:45:00.000+08:00

ഞങ്ങള്‍ അഞ്ചു പെണ്‍കുട്ടികള്‍ .പല ഇടവഴികളില്‍ കൂടൊഴുകി സ്കൂള്‍ പ്രാധന റോഡില്‍ ഒന്നിച്ചുകൂടി കായലില്‍ പോയി പതിക്കാതെ ആ കായല്‍ കരയിലെ സ്കൂളിലെ രണ്ടാം ബെഞ്ചില്‍ ചെന്നു സ്ഥാനം പിടിക്കും .ഈ പതിവു തെറ്റുന്നതു വെള്ളിയാഴ്ചകളിലാണു.( അന്നു 21/2 മണിക്കൂര്‍ ആണു ലഞ്ച്‌ ബ്രേക്ക്‌) .അല്ലെങ്കില്‍ യൂത്ത്‌ ഫെസ്റ്റിവല്‍ നടക്കുന്ന ദിവസങ്ങളില്‍. അന്നു ഞങ്ങള്‍ ചില raids fix ചെയ്യും . ആരുടെ വീട്ടിലാണു പുളി ,ചാമ്പക്ക ,പേരക്ക എന്നിവ പഴുതു എന്ന ഇന്റലിജന്‍സ്‌ റിപ്പോര്‍ട്ട്‌ അനുസരിച്ചാണു വെന്യൂ തീരുമാനിക്കുക .മറ്റു സഹോദരികള്‍ ഒറ്റു കൊടുക്കാതിരുന്നല്‍ സംഭവം ഗ്രേറ്റ്‌ വിജയം .

അങ്ങിനെ സസുഖം കഴിയവെ ആ അത്യാഹിതം സംഭവിച്ചു. shuffling -ഇല്‍ പെട്ടു എന്റെ ക്ലാസ്സ്‌ മാറി. ഞാന്‍ ദുഃഖിതയും ഏകാകിയും ആയി മാരി. ഒരു കൃഷ്ണ ഭക്തയെ രക്ഷിക്കാന്‍ ഭഗവാന്‍ രേഷ്മയുടെ രൂപത്തില്‍ അവതരിക്കാന്‍ നിര്‍ബന്ധിതനായി എന്നു വച്ചോളു . എന്നോടു ചറൂ പറ്ര സംസരിക്കുന്ന ,സഹോദരികളൊടു മറുഭാഷ സംസരിക്കുന്ന രേഷ്മ. അതു കൊങ്കിണി ആണെന്നു പില്‍ക്കാലത്തില്‍ കണ്ടെത്തി. റീന,സീന,ലത തുടങ്ങിയ പതിവു പേരുകളില്‍ നിന്നും ,വിരോണിക്ക,മാര്‍ത്ത ,കര്‍മ്മലിത്ത തുദങ്ങിയ പഴ പേരില്‍ നിന്നും തികച്ചും വ്യസ്ത്യസ്ഥമായി romantic ആയ പേരു ,ഹായി.

അതിലും വലിയ ഒരു സന്തോഷം ഉടനേ കണ്ടെത്തി. രേഷ്മയുടെ വാടകവീടിനടുത്തെ ഇലഞ്ഞി മരം ..അടിച്ചുവാരിയിട്ടിരിയ്ക്കുന്ന പൂമുറ്റത്തെ പഞ്ചാര മണലില്‍ പുഷ്പാജ്ഞലിയും ഇലഞ്ഞി പഴ നൈവേദ്യവും അര്‍പ്പിച്ചുകൊണ്ടുനില്‍കുന്ന ആകാശം മുട്ടുന്ന ഇലഞ്ഞി മരം. സ്കൂള്‍ വഴിയില്‍ നിന്നും ചെറിയ ഡൈവേര്‍ഷ്യന്‍ എടുത്താല്‍ കുറച്ചു പൂ പെറുക്കാം ,അല്ലേങ്കില്‍ ചുവന്നു തുടുത്ത പഴങ്ങല്‍ 3-4 എണ്ണം എങ്കിലും കിട്ടാതിരിക്കില്ല..ഈ രഹസ്യം പഴയ കൂട്ടുകാരില്‍ നിന്നും എന്തിനോ മറച്ചുവച്ചു.

അന്നൊരു ശനിയാഴ്ച..സ്കൂള്‍ ആനിവെഴസറി .അതു ചെറിയ ടൗണില്‍ നാട്ടില്‍ ഒരു സംഭവമാണു അന്നു .... കരിമ്പനകളില്‍ ഇല്ലാതിനാല്‍ തെങ്ങൊലകളില്‍ കാറ്റു പിടിച്ച ഉച്ചനേരം..അമ്മ എന്നെ കൂടീ ഉറക്കാന്‍ കിടത്തി. ഇതു പതിവാണു. എന്നാല്‍ എനിക്കു അമ്മയുടെ ഉറക്കത്തിന്റെ ആഴം അളക്കാം. പ്രിയംവദയായി ഉറങ്ങാന്‍ കിടന്ന ഞാന്‍ ഊരുതെണ്ടിയായി ഉണരുന്നു .പടിഞ്ഞറേ പറമ്പില്‍ കളിക്കാന്‍ പോക്കുന്നു .കുട്ടിയും കോലും അല്ലെങ്കില്‍ ഉപ്പിനു പോകുന്ന വഴി ഒക്കെയാണു പോപ്പുലര്‍ ഐറ്റെംസ്‌ .സ്നാക്സ്‌ വേന്നമെന്നു തോന്നുമ്പോള്‍ പാഷന്‍ ഫ്രൂട്ടു ,ബബ്ലൂസ്‌ നാരകമരത്തിനുമുകളില്‍ റസ്റ്റ്‌ എടുക്കല്‍ .കാപ്പി നേരത്തു കിര്‍ത്യമായി വീട്ടില്‍ ഹാജര്‍. ചേച്ചിമാരുടെ ദുഷ്‌പ്രേരണയാല്‍ വഴക്കു കിട്ടും 144 കുറച്ചു കാലം നടപ്പില്‍ വരും , പക്ഷേ ഇളയകുട്ടിയായതിനാല്‍ അമ്മയും അച്ഛനും ഓവര്‍ലി ലീനെയന്റ്‌ എന്നു ചേച്ചിമാരുക്ക് പരാതി.

(ഇന്നെന്റെ മക്കളെ മൊബൈലിന്റെ കാണചരടില്‍ കെട്ടിയിട്ടു മാത്രമെ ഒരു ബെര്‍ത്ത്‌ 'ഡേ പാര്‍ട്ടിയ്ക്കു പോലും വിടാറുള്ളു...ഇവര്‍ക്കൊരു ബാല്യമില്ലാതെ പോയല്ലൊ എന്നു പറഞ്ഞു പരിതപിക്കുന്നതും ഞാന്‍.)

പക്ഷെ അന്നു ഞാന്‍ കുറചു adventurous ആയി കുറച്ചു ദൂരെയുള്ള രേഷ്മയുടെ വീട്ടിലാണു പോയത്‌. കുട്ടികളുടെ ശല്യം ഇല്ല.. ഞങ്ങള്‍ പൂ പെറുക്കി ,നീണ്ട മാല കോര്‍ത്തു. സമയം പോയതറിഞ്ഞില്ല 5 മണി!,ഞാന്‍ വീട്ടിലേക്കു വച്ച്ചു പിടിച്ചു. അന്നാണു ഞാന്‍ വേലി പരുത്തിടെ കമ്പുമായി നില്‍ക്കുന്ന രൗദ്ര ഭീമനെ ആദ്യമായി അടുത്തു കണ്ടതു.
സീന,റീന കൈമലര്‍ത്തി! പിന്നെ എന്നെ പതിവു സ്ഥലങ്ങളിലും കാണാതെ വിരണ്ടിരിക്കുകയാണു വീട്ടുകാര്‍..എങ്കിലും അടിച്ചില്ല, സമ്മാനം മേടിക്കാന്‍ സ്റ്റജില്‍ കേറുമ്പോള്‍ അടീടെ പാടു കാണണ്ട എന്നു വച്ചണൊ ,തിരിച്ചു കിട്ടിയതിലെ സന്തോഷം കാരണമാണൊ അടിച്ചില്ല.....

എന്നാല്‍ അമ്മയുടെ ശത്രുവായ അയല്‍ക്കാരി ടീച്ചര്‍,റീനയുടെ മമ്മി സംഭവം അവസരോചിതമായി കൈകാരിയം ചെയ്തു അന്നു ചീഫ്‌ ഗെസ്റ്റ്‌നെ സ്വീകരിക്കാനുളള്ള അവസരം എന്നില്‍നിന്നും തട്ടിയകറ്റി സ്വന്തം മകള്‍ക്കു സമ്മാനിച്ചു . ഡിവിഷന്‍സ്‌ -ഇല്‍ ഒന്നാമതാവുന്ന കുട്ടികള്‍ക്കു ഉള്ള ഒരു പ്രിവിലീജ്‌ നഷ്ടമാക്കിയതിലായിരുന്നു അമ്മക്കുസങ്കടം (പൊട്ട
ക്കുളത്തില്‍ പുളവന്‍ ഫണീദ്രന്‍!).

ഞാന്‍ ഇതൊന്നും അറിയാതെ ഇലഞ്ഞി പൂ മണത്തില്‍ അലിഞ്ഞു നടക്കുകയായിരുന്നു.

കാലം കടന്നു പോയി. രേഷ്മ പോയി ഞാന്‍ വീണ്ടും പഴയ സംഘത്തില്‍ ജോയിന്‍ ചെയ്തു .വേമ്പനാട്ടു കായലില്‍ കൂടി പിന്നെയും ബോട്ടുകള്‍ കടലില്‍ മീന്‍ പിടിക്കാന്‍ പോയി ..ഞാന്‍ തിരുവന്തോരം വഴി സിംഗപൂരിലെത്തിയിട്ടിപ്പോള്‍ വര്‍ഷം ഏഴോ എട്ടൊ.

ഒരു നാള്‍ ...എന്റെ പുതിയ appartment നും ബസ്സ്‌ സ്റ്റോപ്പിനും ഇടക്കുള്ള്‌ വഴിത്താരയില്‍ ചില ചെറിയ തണല്‍ മരങ്ങള്‍ ആരൊ trim ചെയ്യുന്നു ...Praks board - എന്റെ ലീലാവിലാസങ്ങള്‍ എന്നു കരുതി ആഞ്ഞു നടന്നു .പെട്ടെന്നു " ഇലഞ്ഞി പൂ മണം ഒഴുകി വരുന്നു ഇന്ദ്രിയങ്ങളില്‍ അതു പടരുന്നു" .. എന്റീശ്വരാ ഈ കൊച്ചു മരങ്ങള്‍ ഇലഞ്ഞിയോ ..എനിക്കു ഇലഞ്ഞി ആകാശം മുട്ടുന്ന മരമാണല്ലൊ..പിന്നെ ആ 18 മരങ്ങളും എന്റെ കൂട്ടുകാരായി. പൂക്കുന്നതും കായ്കുന്നതും കണ്ടു സന്തോഷിച്ചു ..കായ പഴുത്തപ്പോള്‍ ഭയങ്കര വലിപ്പം , ഓറഞ്ചു നിറം. ഒരു കിളിയും കുട്ടിയും ഒന്നും അതിനടുത്തില്ല ..ഫൈനടിക്കാന്‍ ആരും കാണുന്നില്ല എന്നു ഉറപ്പുവരുതി ഞാന്‍ കുറച്ച്‌ പഴങ്ങള്‍ പൊട്ടിച്ചു..ഐയ്യേ വല്ലാത്ത ചവര്‍പ്പും നാവിനൊരു മരവിപ്പും ,വെറുതെയല്ല ഒരു കിളിയെപ്പോലും കാണാത്തെ.

പിന്നീടു ഒരു നാള്‍.. എന്റെ ചെറിയ സല്‍പുത്രി ഒപ്പം ഉണ്ടയിരുന്നു ആ വഴിയില്‍ കൂടെ ..ഞാന്‍ ഒരു പൂവെടുത്തു ബാല്യകാല സ്മരണകളാല്‍ തരളിതമായ ശ്ബദത്തില്‍ പറഞ്ഞു..മോാളെ ..അമ്മയിതു കൊണ്ടു പണ്ടു മാല ഉണ്ടാക്കുമായിരുന്നു ..
അവള്‍ തെല്ലു അവിശ്വനീയത കലര്‍ന്ന സഹതാപത്തോടെ ചോദിച്ചു ..Really?

.

മലയാളം മരിക്കുന്നു

2006-12-10T01:26:00.001+08:00

അപ്രിയമായതൊന്നും പറയാതിരിക്കാനുള്ള മുന്‍ കരുതലാണു സഹ ബ്ലൊഗരെ ഈ പേരിന്റെ പിന്നില്‍ ...എന്തിനെഴുതുന്നു എന്നല്ലെ? മലയാളം മരിക്കാതിരിക്കാന്‍! വടി എടുക്കാന്‍ വരെട്ടെ.. ...

തുടരും

ഓഫീസ്‌ ,അടുക്കള , N T U C( അതിവിടത്തെ സര്‍ക്കാര്‍ പലചരക്കു കടയാണു കൂട്ടരെ
) എന്നിങ്ങനെ ഉള്ള ഒരു ബെര്‍മുഡ triangle-ല്‍ പെട്ടിരിക്കയാണെന്റെ ജീവിതം .അതിനിടയില്‍ മലയാളത്തിന്റെ പ്രസക്തി നഷ്ടപ്പെട്ടുകൊണ്ടിരിക്കുന്നു..

വീട്ടില്‍ പറഞ്ഞൂടെ 'ചേച്ചിക്ക്‌ എന്നു ചോദിച്ചാല്‍ ... എന്റെ ചെറിയ പെണ്‍കുട്ടിക്കാണെങ്കില്‍ മലയാളം കഷ്ടി..മറുപടി ഇംഗ്ലീഷില്‍ .വലിയ പെണ്‍കുട്ടിക്കാണെങ്കില്‍ സംസാരിക്കാന്‍ സമയമില്ല .പിന്നെ ഇവരൊടൊക്കെ ഞാന്‍ കൂടുതലും പറയുന്നതു ചില ത്രീ ലെറ്റ്റ്റര്‍ വേര്‍ഡ്‌സ്‌ ആണെന്നു ഈയിടെ ഞാന്‍ മനസ്സിലാക്കി..കുളിക്കു..പഠിക്കു..കഴിക്കു..(പിന്നെ ദേഷ്യം വരുമ്പോള്‍ അ-സംസ്കൃത മലയാളത്തിനാണു കൂടുതല്‍ പ്രയോഗികത അല്ലെ.)ഓഫീസ്‌ - ഇമെയില്‍ -ബാത്‌ റൂം എന്നിങ്ങനെ വേറൊരു triangle-ല്‍ പെട്ടിരിക്കയാണെന്റെ ശ്രീമാന്‍ ..പിന്നെയീ പെണ്‍ പിള്ളേരെ പഠിപ്പിച്ച്‌ കെട്ടിക്കാനും കാശു വേണമല്ലൊ എന്നോര്‍ക്കുമ്പോള്‍ തത്ര ഭവാനെ അതിന്റെ വഴിക്ക്‌ വിടാതിരിക്കാനും നിവൃത്തിയില്ല. ദാമ്പത്യം വര്‍ഷങ്ങള്‍ പിന്നിടുമ്പോള്‍ മലയാളത്തിനെന്നല്ല ഒരു ഭാഷയ്ക്കും തന്നേ അതില്‍ ഒന്നും ചെയ്യാനില്ല ..ഒന്നും പറയാതെ തന്നേ എല്ലാം രണ്ടുപേര്‍ക്കും അറിയാം .ഒരു മൂളല്‍..ഒരു നോട്ടം ..അത്രമതി. ജീവിത തിരക്കില്‍ വഴക്കടിക്കാന്‍ പോലും നേരമില്ല

ഓഫീസില്‍ ഒരു മലയാളി മരുന്നിനു ഉണ്ടു .. .. ഒരു പാവത്താന്‍ MP3 മലയാളം പാട്ടു തന്നു സഹായിക്കും .ആള്‍ എന്നെ പരസ്യമായി ചേച്ചി എന്നു വിളിച്ചു സംസാരിക്കുന്നതിനാല്‍ കൂട്ടു വെട്ടി ..(note the point;) ) പിന്നെ ഒരു വള്ളുവനാടന്‍ പെണ്‍ കുട്ടി ഉണ്ടായിരുന്നു . എല്ലാ ഭാഷയിലും എന്ന പോലെ മലയാളത്തിലും മൗനം പലിക്കുന്ന ഒരു കുട്ടി..നാട്ടിലെ ഓഫീസില്‍ കലാപില സംസരിച്ചു എല്ലാ സഹപ്രവര്‍ത്തകരുടെയും അമ്മായി അമ്മയുടെ വരെ നാളു വരെ അറിഞ്ഞുനടന്നതിന്റെ ശിക്ഷ ..ആ കുട്ടിടെ ഭര്‍ത്താവിന്റെ പേരും പോലും അറിഞ്ഞതു 6 മാസം കഴിഞ്ഞാണു..അത്ര സംസാരപ്രിയ.(പിന്നെ കുറെ ഹിന്ദിക്കാര്‍..അവര്‍ പറയുന്നതു sub title ഇല്ലാതെ ഹിന്ദി സിനിമ കാണുന്നതു പോലാണെനിക്ക്‌..സംഗതി മനസിലായിവരുമ്പൊ അടുത്ത സീന്‍ കഴിയും.ബഹു ഭൂരിപക്ഷം വരുന്ന chinese, indonesian,Philipiino ഇവരൊടെല്ലാം തെറി /പ്രാക്കു മാത്രം വേണമെങ്കില്‍ മലയാളത്തില്‍ പറയാം..പക്ഷെ ഞാന്‍ പ്രിയംവദ അല്ലെ?

കടകളില്‍ singlish മതി..ഇംഗ്ലീഷിന്റെ സിംഗപൂര്‍ എഡീഷന്‍ .സ്കൂളില്‍- preposition പഠിപ്പിച്ചപ്പോള്‍ ഉറങ്ങിയവര്‍ക്കു എല്ലാം സിംഗപൂരിലേക്കു സ്വാഗതം. ഗ്രാമെറിനെ കുറിച്ചോര്‍ത്തു വിഷമിക്കാതെ തന്നെ സംസാരിക്കാം.പിന്നെ ചില പാര്‍ട്ടികളില്‍ ആണു മലയാളത്തിനു സ്കോപ്‌ ..പക്ഷെ യുവ ഭാര്യമാര്‍ ഇംഗ്ലീഷ്‌ മീഡിയംകാരായതിനാലവണം മലയാളം അത്ര പോര.. കുട്ടികളുടെ വിദ്യാഭ്യാസം, .കാര്‍ത്തിക സ്റ്റോറില്‍ പപ്പടം കിട്ടും എന്നിങ്ങനെ പതിവു വിഷയം ..പിന്നെ സ്വല്‍പ്പം പരദൂഷണം.. പക്ഷെ ഞാന്‍ പ്രിയംവദ അല്ലെ!

പിന്നെ കത്തുകള്‍ ..അതിപ്പൊ കിട്ടാനില്ല..കഷ്ടപെട്ടു കത്തും draft ഉം അയച്ചാല്‍ SMS മറുപടി! അത്ര തിരക്കാണു എന്റെ ബന്ധു ജനങ്ങള്‍ക്കു .പണ്ടൊക്കെ ഫ്രണ്ട്‌സിന്റെ കത്തു വരുമായിരുന്നു..ഇപ്പൊ ആ സമ്പ്രദായം എല്ലാം അന്ന്യം നിന്നു..നമ്മള്‍ കത്തയച്ചാല്‍ നമ്മളെ archaeology വകുപ്പിലേക്ക്‌ റെഫര്‍ ചെയ്തെക്കുമൊ എന്നു ആണു ഭയം .

asianet വന്നാല്‍ എല്ലാം ശരിയാകും എന്നു കരുതി !.കഴിഞ്ഞ ഒന്നര വര്‍ഷത്തില്‍ കണ്ടതു 4-5 നല്ല പരിപാടികള്‍.എം. കൃഷ്ണണന്‍ നായര്‍ പറയുമ്പോലെ വമനേഛ ഉണര്‍ത്തുന്ന സീരിയലുകള്‍ , നൂറ്റൊന്നാവര്‍ത്തിക്കുന്ന സിനിമകള്‍. കുറെ പഴയ പാട്ടുകള്‍ ഓര്‍മപ്പെടുത്തി എന്നതു ഗുണം ..നാട്ടില്‍ ഇത്രയും സ്വര്‍ണ കടകള്‍, തുണികടകള്‍ വന്നു എന്നു അറിഞ്ഞു..ഇതു ഭയങ്കര കമ്മെര്‍ഷ്യല്‍ ചാനല്‍ ആണെന്നു മോള്‍. അതു പിന്നെ നല്ല മലയാളം പരിപാടികള്‍ ദൂരദര്‍ശനില്‍ ആണെന്നു പറഞ്ഞു തടി തപ്പി.ആണൊ?.. ശ്രീ കണ്ഠന്‍ നായര്‍ക്ക്‌ കത്തയക്കാമെന്നു വിചാരിച്ചു..അതു പിന്നെ മലയാള മനോരമ വീക്കിലി മാതൃഭൂമിവീക്കിലി ആവണമെന്നു വാശി പിടിക്കുന്ന പോലെ അല്ലെ ?

ഏതാണ്ടു കിട്ടുന്നതെല്ലാം വായിച്ചും തോന്നുതു എല്ലാം പറഞ്ഞും മലയാള ഭാഷയെ ഒരു വഴിക്കു ആക്കി വന്നതിന്റെ ശിക്ഷ.

മാസങ്ങള്‍ക്കു മുന്‍പു മാതൃഭൂമിയില്‍ മലയാളം ബ്ലോഗ്ഗിനെ പറ്റി ലേഖനം കണ്ടു .പിന്നെ തിരക്കില്‍ പെട്ടതു മറന്നു..

മലയാളം പത്രം വെബ്‌ എഡീ‍ഷന്‍ എല്ലാം അവഗണിച്ചു ലഞ്ച്‌ ടൈം-ഇല്‍ ബ്ലൊഗ് വായിക്കാന്‍ തുടങ്ങിയ്ട്ടിപ്പോള്‍ കുറച്ചു ദിവസമായി..ഇതിനുപിന്നില്‍ പ്രവര്‍ത്തിച്ചവര്‍ക്കെല്ലാം അഭിനന്ദനങള്‍ ..ഈ ബൂലൊഗത്തിന്റെ ഭൂമി ശാസ്ത്രം മൊത്തം പിടി കിട്ടിയിട്ടില്ല..എങ്കിലും എന്റെ മലയാളം മരിക്കാതിരിക്കാന്‍ ഇവിടെ കുറിപ്പുകള്‍ ഇട്ടു തുടങ്ങാമെന്നു തോന്നുന്നു..പക്ഷെ സ്പീഡ്‌ കിട്ടുന്നില്ല..ഇംഗ്ലീഷ്‌ വാക്കുകളും പിഴകളും തല്‍ക്കാലം പൊറുക്കുക. ഒരു സ്പ്പെല്‍ ചെക്കര്‍ കിട്ടിയെങ്കില്‍..അതിമോഹമാണു അല്ലെ! പഴക്ക ദോഷം. ക്ഷമീരു!

p. s നിറ്‌ദ്ദേശങ്ങള്‍ക്കു നന്ദി !.

പ്രിയരേ!

2006-12-08T13:27:00.000+08:00

തുടരും